შშმ აქტივისტი, მოქალაქე დეა ერემაშვილი ამბობს, რომ საჯარო რეესტრმა მისი პერსონალური ინფორმაცია გამოაქვეყნა, რითაც დაარღვია კანონი პერსონალურ მონაცემთა დაცვის შესახებ.
„კოალიცია დამოუკიდებელი ცხოვრების ცენტრი“, რომელთანაც ვთანამშრომლობდი, დარეგისტრირდა ეგრეთ წოდებული უცხოური გავლენის რეესტრში, რის საფუძველზეც მან იუსტიციის სამინისტროს კანონით განსაზღვრული ყველა ინფორმაცია მიაწოდა, თუმცა საჯარო რეესტრის ეროვნულმა სააგენტომ დაარღვია პერსონალურ მონაცემთა დაცვის შესახებ კანონი და ჩემი პირადი ინფორმაცია – სახელი, გვარი და ორგანიზაციისგან მიღებული ხელფასი გამოაქვეყნა, რაც კანონდარღვევაა.
სახელმწიფო ვალდებული იყო დაეშტრიხა ჩემი პერსონალური მონაცემები, თუმცა ასე არ მოიქცნენ და ღიად გამოაქვეყნეს ჩემი პერსონალური მონაცემები.
„რუსული კანონის მიღებისას „ქართული ოცნების“ ხელისუფლება ირწმუნებოდა, რომ ფიზიკურ პირებს, ასევე შშმ პირებს არ შეგვეხებოდა ეს კანონი, თუმცა ფაქტია, რომ მათ მოატყუეს საზოგადოება. აგერ არის გამოდებული ჩემი პირადი ინფორმაცია.
მე რომ 2023 წლის ივლისში ხელფასი ავიღე, აი, ის ჩანს და აგენტების რეესტრში ვარ ადამიანი, რომელიც კატეგორიულად ვეწინააღმდეგები ამ კანონს.
ორგანიზაციების დიდი ნაწილი იმიტომ დარეგისტრირდა, რომ ამბობდნენ, ბენეფიციარების უფლებები უნდა დავიცვათ და ვერ შევუწყვეტ სერვისსო და ამ დროს, ჩემი უფლება ირღვევა“ – ამბობს დეა ერემაშვილი.
მან პერსონალურ მონაცემთა დაცვის სამსახურს უკვე მიმართა განცხადებით და მოითხოვა რეაგირება ფაქტზე.
„სახელმწიფოს მხრიდან განსაკუთრებული კატეგორიის ინფორმაციის ხელყოფაზე მივუთითე და მოვითხოვე რეაგირება. ხუთ სამუშაო დღეში უნდა გამცენ პასუხი და დაველოდები. თუ არ ექნებათ რეაგირება, მივმართავ სასამართლოს და მოვითხოვ მორალურ ზიანს 41 ლარს 41 თეთრს“ – ამბობს დეა ერემაშვილი.
„ქართულმა ოცნებამ“ საზოგადოების წინააღმდეგობის ფონზე, მრავალათასიანი საპროტესტო აქციების მიუხედავად მაინც მიიღო რუსული კანონი, რომელიც ითვალისწინებს იმ ორგანიზაციების „უცხოური გავლენის რეესტრში“ დარეგისტრირებას, რომლებიც დასავლური ფონდებისგან, მათ შორის საქართველოს სტრატეგიული პარტნიორი ქვეყნებისგან ფინანსდებიან.
რუსული კანონის მიღებამ შეაფერხა საქართველოს ინტეგრაცია ევროკავშირში.
