თურქული ხომალდი დღეს, 20 აგვისტოს, დილის 6 საათზე, საქართველოს ტერიტორიულ წყლებში შემოვიდა და ზღვაში დაკარგული ორი სამხედროს სამძებრო-სამაშველო სამუშაოებში ჩაერთო.
ლევან იზორია დაკარგული სამხედროების ოჯახის წევრებთან / 20.08.2016 / ფოტო: როინ გუნდაძე
“გავეცანი თურქული ხომალდის ეკიპაჟს, ძალიან მაღალკვალიფიციური ეკიპაჟია და თავიანთი საქმის პროფესიონალები არიან. ხომალდი ასევე აღჭურვილია მაღალტექნოლოგიური აპარატურით, რაც შესაძლებელს ხდის ამ ოპერაციის ეფექტიანად განხორციელებას, მზაობა დიდია, ისინი ჩამოსული არიან მინიმუმ 3 დღით, თუმცა იმის პირობასაც იძლევიან, რომ იმ შემთხვევაში, თუ კონკრეტული შედეგი არ გვექნა ეს პერიოდი გახანგრძლივდება”,- განაცხადა ლევან იზორიამ ჟურნალისტებთან საუბრისას, რომელიც ხომალდზე უშუალოდ იმყოფებოდა.
დღეს შემთხვევის ადგილზე იმყოფებოდა ასევე თურქეთის გენერალური კონსული ბათუმში, იასინ თემიზქანი.
საქართველოს თავდაცვის მინისტრი, მისივე თქმით, დღეს გონიოში კვლავ ჩავა.
სპეციალური ოპერაციების ძალების ორმა სამხედრო მოსამსახურემ, შავ ზღვაზე გეგმური საზღვაო სპეცდანიშნულების სწავლების დროს, ზღვაში სიღრმითი ჩაყვინთვის შემდეგ, ვერ შეძლო ზღვის ზედაპირზე ამოსვლა. დაკარგულ სამხედროებს უკვე მეოთხე დღეა ეძებენ.
მომხდართან დაკავშირებით სამხედრო პოლიციის დეპარტამენტში, საქართველოს მთავარ პროკურატურასთან შეთანხმებით, დაწყებულია გამოძიება საქართველოს სისხლის სამართლის კოდექსის 116-ე მუხლის II ნაწილით, რაც გაუფრთხილებლობით ორი ან მეტი პირის მიმართ სიცოცხლის მოსპობის მუხლია.
სამძებრო-სამაშველო ოპერაცია / 20.08.2016 / ფოტო: როინ გუნდაძე
