22 წლის გიორგი ბოლქვაძე ბათუმის შოთა რუსთაველის სახელმწიფო უნივერსიტეტში, საერთაშორისო ურთიერთობების ფაკულტეტის მეოთხე კურსზე სწავლობს. გასულ წელს ის ერაზმუსის სასწავლო პროგრამაში ჩაერთო, რომელიც საქართველოში ევროკავშირის დაფინანსებით ხორციელდება. 2023 წლამდე მხოლოდ სასტიპენდიო პროგრამებზე ერაზმუსმა დაახლოებით 12 მილიონი ევრო დახარჯა.
პროგრამის ფარგლებში, გიორგი ბოლქვაძემ ერთი სემესტრი ავსტრიაში გაატარა. ამ დროის განმავლობაში გიორგი საცხოვრებელი ხარჯებისთვის სტიპენდიასაც იღებდა.
„თავიდანვე ვიცოდი, რომ ბსუ პოპულარული იყო თავისი გაცვლითი პროგრამებით, ამიტომაც ჩავაბარე ამ უნივერსიტეტში. გასულ წელს ერთი სემესტრი ვცხოვრობდი და ვსწავლობდი ავსტრიაში, ზალცბურგის უნივერსიტეტში. თავიდანვე მქონდა მოლოდინი, რომ ეს ძალიან მნიშვნელოვანი პერიოდი იქნებოდა ჩემს ცხოვრებაში, რომ ბევრ ახალ რამეს ვისწავლიდი, მაგრამ სიმართლე გითხრათ, ამ დონეზე კარგი გამოცდილება თუ იქნებოდა, არ ველოდი,” – ამბობს გიორგი ბოლქვაძე.
როგორც გიორგი გვიყვება, ერაზმუსი არ არის მხოლოდ სწავლაზე ორიენტირებული პროგრამა.
„ეს მოიცავს მასპინძელ ქვეყანაში ჩასვლას, დამოუკიდებელ ცხოვრებას, საკუთარი თავის განვითარებას, ამ ქვეყნის კულტურის გაცნობას და ა.შ. ჩემი მიზანიც მხოლოდ სწავლა არ იყო, მინდოდა მაქსიმალური შედეგები მიმეღო ამ პროცესისგან.
პროგრამა ბევრ საშუალებას გაძლევს: იქ ყოფნის დროს მე ვიღებდი სტიპენდიას, რაც სრულიად საკმარისი იყო იმისთვის, რომ სწავლაში ჩართულობის პარალელურად შემძლებოდა ინტეგრაცია ადგილობრივ კულტურაში, სტუდენტებთან ურთიერთობა, მოგზაურობა.
ჩემი მთავარი მონაპოვარი არ არის ის კრედიტები, რომელიც მე უნივერსიტეტში მივიღე. ჩემი მთავარი მონაპოვარია იქ მიღებული გამოცდილება, დამოუკიდებლად ცხოვრება, ენის გაუმჯობესება, ახალი მეგობრების გაჩენა, უცხო რაღაცებზე დაკვირვება. ახლა ყველას ვურჩევ, რომ ამ გაცვლითი პროგრამით ისარგებლონ“, – ამბობს გიორგი და დასძენს, რომ გაცვლით პროგრამაში მონაწილეობის შემდეგ, როცა 5-6 თვეს ატარებ უცხო კულტურაში, ცხოვრებაში ყველაფერი მარტივი ხდება.
სემესტრის განმავლობაში გიორგი ბოლქვაძემ ევროკავშირის საგანმანათლებლო პროგრამისგან სტიპენდიის სახით 4 ათასი ევრო მიიღო და როგორც ის ამბობს, ამის გარეშე დამოუკიდებლად ავსტრიაში სწავლას ვერ შეძლებდა:
„ჩემს გარშემო უამრავი ადამიანია, ვისაც უსარგებლია ევროკავშირის სხვადასხვა პროგრამით, დახმარებით, გრანტით, გაცვლითი პროგრამით და ა.შ. მე 4 ათასი ევროთი დამიფინანსეს სწავლა, რის გადახდასაც დამოუკიდებლად ვერ შევძლებდი. მსგავსი პროგრამების გარეშე, ჩემნაირი სტუდენტები საკუთარ ცხოვრებას ვერ შევცვლით უკეთესობისკენ.
გარშემო რომ მიმოვიხედოთ, ევროკავშირის დახმარებით ხორციელდება უამრავი პროექტი და ეს სასიცოცხლოდ მნიშვნელოვანია ჩვენნაირი განვითარებადი ქვეყნებისთვის“ – ამბობს გიორგი.
უნივერსიტეტის საერთაშორისო ურთიერთობების კურსდამთავრებული მიიჩნევს, რომ საქართველო ახლა რთულ პროცესს გადის.
„ჩვენ არ ვართ საუკეთესო მდგომარეობაში, რაშიც უნდა ვიყოთ. რა დახმარებასაც ჩვენ ვიღებთ იგივე ევროკავშირისგან და ამერიკისგან, თუ სხვა ქვეყნებისგან, ამ დახმარებების ფონზე უფრო უკეთესად უნდა ვიყოთ და იმაზე ნერვიულობა და ფიქრი კი არ უნდა გვიწევდეს, რომ დღეს ან ხვალ უვიზო მიმოსვლა შეიძლება შეგვიჩერონ, არამედ პირიქით, შვებას უნდა ვგრძნობდეთ – რომ კანდიდატის სტატუსი მივიღეთ და სულ ცოტა გზა დაგვრჩა წევრობამდე.
ჩვენ სულ სხვა რეალობაში უნდა ვცხოვრობდეთ ახლა და ამის ნაცვლად, იმაზე ვნერვიულობთ, გაიხსნება თუ არა მოლაპარაკებები. ეს კი არა, უამრავი პროგრამის შეჩერებაზე ვნერვიულობთ“.
გიორგი ბოლქვაძე მიიჩნევს, რომ საქართველოს მოქალაქეებს სათანადოდ არ აქვთ შეფასებული, თუ რამდენი სიკეთის მოტანა შეუძლია ევროკავშირის წევრობას:
„ჩვენ ვერ ვაფასებთ თუ რამხელა სარგებელი შეიძლება მოგვიტანოს წევრობამ. კი ვიცით, კი ვხედავთ ამ დახმარებებს და პროგრამებს, მაგრამ ვერ ვიაზრებთ, კიდევ რამდენი სიკეთის მოტანა შეუძლია წევრობას. ევროკავშირში გაწევრება, როგორც აგრონომიის და ტურიზმის განვითარებას შეუწყობს ხელს, ისე შეუწყობს სხვა სფეროებს და ზღვა სიკეთეს მივიღებთ“.
მისივე სიტყვებით, ახალგაზრდები იმაზე არ უნდა ფიქრობდნენ, რომ ამ ქვეყნიდან გაქცევა შეიძლება მოუწიოთ:
„ჩვენ არ უნდა ვფიქრობდეთ, რომ თუ ოქტომბერში დაგეგმილი არჩევნების შედეგები ისეთი არ იქნება, როგორიც ქართველ ხალხს სურს, თავს როგორ ვუშველოთ და სად გავიქცეთ. ქართველი ხალხი ამაზე ფიქრსა და ნერვიულობას არ იმსახურებს,” – ამბობს გიორგი.
ბათუმის სახელმწიფო უნივერსიტეტის სტრატეგიული განვითარებისა და საერთაშორისო ურთიერთობების დეპარტამენტის ხელმძღვანელი, მარინე გიორგაძე გვეუბნება, რომ ყოველწლიურად უნივერსიტეტი ორმოცდაათზე მეტ სტუდენტს უშვებს საზღვარგარეთ სასწავლებლად და სტაჟირების გასავლელად. ხოლო, აქ 15-მდე უცხოელი სტუდენტი ჩამოდის:
„ჩვენ, ერაზმუსის გარდა, სხვადასხვა ქვეყნის უნივერსიტეტთან მემორანდუმები გვაქვს გაფორმებული, რომლის ფარგლებში სტუდენტები უცხოეთში სასწავლებლად და სტაჟირებისთვის მიემგზავრებიან. ასევე, აჭარის განათლების სამინისტროს დაფინანსებით არაერთი სტუდენტი მიდის სასწავლებლად. პარალელურად, ყოველწლიურად ბსუ-დან 20 მდე პროფესორი მიდის უცხოეთში და იქ კითხულობენ ლექციებს“.
როგორც მარინე გიორგაძე აღნიშნავს, ეს პროექტი ძალიან მნიშვნელოვანია როგორც სტუდენტებისთვის, ისე აკადემიური პერსონალისთვის.
„მე პირადად ერაზმუსის ერთ-ერთი პირველი მონაწილე ვარ, საფრანგეთში სტაჟირებით წავედი და იქ ვმუშაობდი. მთელი ჩემი მომდევნო კარიერა ამ გამოცდილებამ მნიშვნელოვნად განსაზღვრა.
ეს პროცესი არ შენელებულა, სულ უფრო და უფრო მეტი შემოთავაზება გვაქვს. ორმოცდაათამდე ხელშეკრულება გვაქვს ერაზმუსის მიმართულებით და ასზე მეტი გვაქვს პირდაპირი მემორანდუმები“ – ამბობს მარინე გიორგაძე.
გარდა ამისა, ევროკავშირის ფინანსური მხარდაჭერით, ბსუ-ს ინსტიტუციური განვითარებისთვის არაერთი პროექტი განხორციელდა:
„ინსტიტუციური განვითარების ძალიან კარგი პროექტები განხორციელდა. ევროკავშირის მხარდაჭერით კომპიუტერული ტექნიკა შევიძინეთ, მოეწყო ლაბორატორიები, შეიქმნა ახალი სასწავლო კურსები, განახლდა კურიკულუმები“.
ერაზმუს+ არის პროგრამა, რომელიც აერთიანებს ევროკავშირის ყველა მიმდინარე სქემას განათლების, ტრენინგების, ახალგაზრდობისა და სპორტის მიმართულებით, ის 2014 წლის იანვარში დაიწყო. აქედან მოყოლებული საქართველოსა და ევროკავშირს შორის სტუდენტებისა და აკადემიური პერსონალის მონაწილეობით 11,000-ზე მეტი გაცვლითი პროექტი განხორციელდა.2023 წლამდე მხოლოდ სასტიპენდიო პროგრამებზე საქართველოსთვის- როგორც სტუდენტების, ასევე პროფესორ-მასწავლებლების – „ერაზმუსმა“ დაახლოებით 12 მილიონი ევრო დახარჯა.
რუსული კანონის მიღების გამო, ამჟამად საქართველოს ევროკავშირში გაწევრების პროცესი შეჩერებულია. უკვე შეწყდა სხვადასხვა სახელმწიფო ინსტიტუტების დაფინანსება ევროკავშირის მიერ.
2019-2024 წლებში საქართველოს სამინისტროებისა და სხვა სახელმწიფო ინსტიტუტების მიერ მიღებული ევროკავშირის დაფინანსება 517 მილიონ ევროს შეადგენდა.
როცა ევროკავშირი ასე ახლოსაა, არავის მისცე უფლება უკან დაგვაბრუნოს.
