2025 წლიდან ზოგადი განათლების საბაზო საფეხური გახანგრძლივდება და მოსწავლეები მეცხრე კლასის ნაცვლად საბაზო საფეხურს მეათე კლასში დაასრულებენ.
ცვლილება შეეხება იმ მოსწავლეებსაც, რომლბიცე 2024-2025 სასწავლო წელს მე-9 კლასში იქნებიან.
ბრძანების მიხედვით, ის მოსწავლეები, რომლებსაც სტატუსი 2024-2025 სასწავლო წლის ჩათვლით ზოგადი განათლების საშუალო საფეხურის მე-10 კლასში შეუჩერდათ და ამ სტატუსს აღიდგენენ 2025-2026 სასწავლო წლიდან, სწავლას გააგრძელებენ მე-11 კლასში.
მოსწავლეები, რომლებიც ვერ დაძლევენ 2024-2025 სასწავლო წელს ზოგადი განათლების საშუალო საფეხურის X კლასისთვის ეროვნული სასწავლო გეგმით დადგენილ მიღწევის დონეს, 2025-2026 სასწავლო წლიდან სწავლას გააგრძელებენ ზოგადი განათლების საშუალო საფეხურის XI კლასში.
ამავე ბრძანების მიხედვით, საგანმანათლებლო დაწესებულება, რომელიც ახორციელებს ისეთ პროფესიულ საგანმანათლებლო პროგრამას, რომელშიც ინტეგრირებულია ზოგადი განათლების საშუალო საფეხურის 3 წლის სწავლის შედეგები, უფლებამოსილია, 2025 წლის პირველ ივლისამდე გამოცხადებული პროფესიულ სტუდენტთა მიღების საფუძველზე ჩარიცხულ სტუდენტებს სწავლა დაასრულებინოს და მიანიჭოს ამ პროგრამით გათვალისწინებული კვალიფიკაცია.
„ამ შემთხვევაში გაცემული საშუალო პროფესიული განათლების დამადასტურებელი დოკუმენტი – დიპლომი, გათანაბრებულია სრული ზოგადი განათლების დამადასტურებელ დოკუმენტთან“, – წერია ბრძანებაში.
აღნიშნული კანონი ამოქმედდება 2025 წლის პირველი ივლისიდან.
