„ისეთი სუნია, სული მეწვის, ცუდად ვარ. მიდით გააშუქეთ, რაღაცა ქენით“, – დაგვირეკა მოქალაქემ რედაქციაში. მან დაჟინებით მოითხოვა ბათუმის საბაგიროსთან ჟურნალისტის მისვლა. „არა, ახლა მინდა, ახლა მოდით, მერე არ მინდა“, – საქმე ისაა, რომ ბათუმში, საბაგიროს მიმდებარედ, სანაპიროზე პერიოდულად გაუსაძლისი სუნია.
მოიჯარეები, რომლებიც იქ მუშაობენ, კომერციულ საქმიანობას ეწევიან, აცხადებენ, რომ „კანალიზაციის სუნს“ ზღვაში გამავალი მილი იწვევს და ამ პრობლემის თაობაზე არაერთ სახელმწიფო უწყებას მიმართეს, თუმცა უშედეგოდ.
„ტურისტები სახეზე იფარებენ, ცხვირზე ხელს იჭერენ და ისე დადიან. ცდილობენ სწრაფად გაიარონ და დატოვონ ეს ადგილი. რამდენჯერ დავრეკეთ 153-ზე – გარემოს დაცვიდან მოდიან, შეხედავენ მიდიან. ერთხელ ოქმი დაწერეს და მილი დააგრძელეს, ჩაუშვეს ზღვაში, ამას არანაირი შედეგი არ მოჰყოლია. გვიმტკიცებენ სანიაღვრეაო, პირდაპირ გამოდის ფეკალური მასები, სალფეთქები. არ არის ეს წვიმის წყალი, ტუალეტის წყალია, მოდით და გადაიღეთ.
პერიოდულად კეტავენ. ხან დიდი ოდენობით მოდის. უკვე აღარ ვიცით, ვის მივმართოთ, ბათუმის წყალში დავრეკეთ, სად არ დავრეკეთ, რეაგირება არ არის. დაკეტავენ – გაუშვებენ ისევ. გარემოს დაცვა რომ მოვა, მაშინ კეტავენ, მერე ისევ უშვებენ. ხან ღამით უშვებდნენ, ახლა არც დღე აინტერესებთ და არც ღამე. ტურისტი აქ მოდის, საბაგიროსთან, სირცხვილი არ არის? – მაგიტომ დაგიკავშირდით თქვენ, გააშუქეთ, რაღაცა ქენით. კიდევ ვის მივმართო“, – ამბობს გიორგი აბულაძე.
გიორგი აბულაძე
„ფეკალიები ჩაედინება პირდაპირ ზღვაში. სუნი გაუსაძლისია, გაურბის ყველა ამ სუნს. აქ იჯარის თანხას ვიხდით და კლიენტი აღარ გვყავს. ბევრჯერ დავრეკეთ და არაფერი. ვერაფერს წყვეტენ ეს უკვე სახელმწიფო დონეზე უნდა გადაწყდეს. სხვანაირად არ ხდება, ხომ ხედავთ“, – ამბობს შალვა ტაკიძე. ისიც აქ მუშაობს.
შალვა ტაკიძე
შპს „ბათუმის წყლის“ ინფორმაციით, ეს სანიაღვრე მილია – აქ მომუშავეები კი აცხადებენ, რომ ამ მილის გავლით ზღვაში კანალიზაციის წყალი შედის
ბათუმის საბაგიროსთან, ქალაქის ერთ-ერთ ცენტრალურ ადგილზე, გაუსაძლისი სუნი იყო მაშინაც, როცა „ბათუმელები“ ადგილზე მუშაობდა, პერიოდულად ეს სუნი მძაფრდებოდა, მილთან მიახლოებისას სუნი იმდენად გაუსაძლისი ხდებოდა, რომ ახლოს გაჩერება შეუძლებელი იყო.
ეს ადგილი უცხოელი ტურისტებისა და ქალაქის სხვა სტუმრებისთვის ერთ-ერთი მნიშვნელოვანი ზონაა, თუმცა ის წლებია მოუწესრიგებელია. დამცავ ნაგებობასა და სანაპიროს შორის წყალი დაჭაობებულია, სანაპირო კი მუდმივად ნარჩენებითაა დაბინძურებული. აქვეა ტურისტული ცენტრიც [„ბათუმელებმა“ აქ არსებული ვითარება გადაიღო, ვიდეოს გამოვაქვეყნებთ].
მოქალაქე, რომელმაც „ბათუმელებში“ დარეკა, გარემოს დაცვის ზედამხედველობის დეპარტამენტსაც დაუკავშირდა, მან ცხელ ხაზზე დარეკა. ჩვენი მისვლიდან ცოტა ხანში ადგილზე გარემოსდაცვითი დეპარტამენტის 2 თანამშრომელი მივიდა. მათგან ერთ-ერთმა მილთან დაკავშირებით პირად საუბარში გვითხრა: „ეს აქ არ უნდა იყოს“.
გარემოსდაცვითი ზედამხედველობის სამსახურის თანამშრომლებს მოქალაქე უხსნის, რა ვითარება ადგილზე და რატომ გამოიძახეს ისინი
„მოვა „სპეციალური სამსახური“ და მას ჰკითხეთ, მისგან აიღეთ ინტერვიუ“ – გვითხრა გარემოსდაცვის თანამშრომელმა
გარემოს დაცვის ზედამხედველობის წარმომადგენელი ინტერვიუზე არ დაგვთანხმდა – გვითხრა, რომ გამოიძახეს „სპეციალური სამსახური“ და გაარკვევენ, რასთან გვაქვს საქმე. 40 წუთზე მეტ ხანს ველოდეთ „სპეციალურ სამსახურს“. მოქალაქეს დაურეკეს და უთხრეს, რომ საცობის გამო აგვიანებენ. საბოლოოდ კი „ბათუმის წყლის“ წარმომადგენელი მოვიდა. ერთ-ერთი ხელმძღვანელი პირი და არა სპეციალისტი.
მან გვითხრა, რომ განმარტებას ვერ მოგცემს, რადგან უფროსთან შეთანხმების ვალდებულება აქვს.
სანაპირო, სადაც ვერ დაისვენებთ, აქ საშინელი სუნია
მილიდან პერიოდულად ასეთი წყალი გამოდის
„ბათუმის წყლის“ წარმომადგენელს არაფერი გაუკეთებია, ან რა უნდა გაეკეთებინა, მასთან ერთად სპეციალისტები არ ყოფილან. გარემოსდაცვითი ზედამხედველობის დეპარტამენტის წარმომადგენლებმა სავარაუდოდ კიდევ ერთი ოქმი შეადგინეს და წავიდნენ.
ჩვენ მოგვიანებით „ბათუმის წყლის“ პრესსამსახურს დავუკავშირდით და განმარტება ვთხოვეთ. „ბათუმის წლიდან“ პასუხი წერილობით გამოგვიგზავნეს. პასუხის მიხედვით, ისინი არაფერს არ გააკეთებენ:
„აღნიშნულ ტერიტორიაზე მრავალი წლის განმავლობაში ფუნქციონირებს ქალაქის სანიაღვრე მილი. სავარაუდოდ, ფიზიკური ან იურიდიული პირების მხრიდან ადგილი აქვს წყალარინების ქსელის უკანონო დაერთებას სანიაღვრე ქსელზე, რომლის დადგენაც ამ ეტაპისთვის შეუძლებელია“, – მოგვწერეს „ბათუმის წყლიდან.“
„ბათუმის წყალში“ ვარაუდობენ, რომ სანიაღვრე მილზე უკანონო დაერთებებია და ეს ყველაფერი ზღვაში უპრობლემოდ გაედინება. მათი ვარაუდი ვარაუდად დარჩება, რადგან: „ამ ეტაპისთვის დადგენა შეუძლებელია“. ასევე უცნობია ეს „ეტაპი“ რა პერიოდს მოიცავს – ერთ თვეს, ერთ წელს, თუ უფრო მეტს.
შპს „ბათუმის წყლიდან“ 2024 წლის 16 ივლისს მოგვწერეს, რომ „აღნიშნულ ტერიტორიაზე ქალაქის სანიაღვრე მილი მრავალი წლის განმავლობაში არსებობდა და ფუნქციონირებდა. სანიაღვრე მილის გამტარუნარიანობის გაზრდის მიზნით მოხდა აღნიშნული მილის სიგრძის გაზრდა და ზღვის სიღრმეში შეყვანა.“
საბაგიროს მიმდებარედ არსებულ ვითარებასა და ზღვაში გამავალ მილზე „ბათუმელებმა“ ინფორმაცია ქალაქის მერიისგანაც გამოითხოვა 17 ივლისს, თუმცა პასუხი დღემდე არ მიგვიღია.
