100 ახალ მიკროავტობუსში ბათუმი 15,9 მილიონ ლარს გადაიხდის – ავტობუსების შემოტანა დაწყებულია
„ბათუმის ავტოტრანსპორტი“ 100 მიკროავტობუსს ჯამში 15 944 800 ლარად იყიდის. ხელშეკრულება შპს „ჯი-თი მოტორსთან“ არის გაფორმებული და მიკროავტობუსების ბათუმში შემოტანაც ეტაპობრივად დაწყებულია. მიკროავტობუსების ღირებულებასაც ეტაპობრივად გადაუხდიან კერძო კომპანიას.
ახალი მიკროავტობუსები ბათუმის მერიის შპს „ბათუმის ავტოტრანსპორტის“ ტერიტორიაზე
დოკუმენტების მიხედვით:
- მიკროავტობუსების [კატეგორია: M2; ბრენდი: FORD; მოდელი: Transit 460E; გამოშვების წელი: 2024] მწარმოებელია FORD, ხოლო მწარმოებელი ქვეყანა – თურქეთი.
- ერთი მიკროავტობუსის შესყიდვის სახელშეკრულებო ფასი 159 448 ლარია, თუმცა, „ამ ღირებულებაში შედის მიწოდების უზრუნველყოფა მიმწოდებლის ხარჯებით საქართველოს კანონმდებლობით განსაზღვრული ყველა სახის გადასახადის, მოსაკრებლის, მათ შორის, განბაჟებისა და სახელმწიფო რეგისტრაციის ხარჯების [შემსყიდველზე გადაფორმებისა და სტანდარტული ფასის სახელმწიფო სანომრე ნიშნების] ჩათვლით; ამასთან, გეგმიური ფლობის ღირებულება მოიცავს დღგ-საც“.
ხელშეკრულება „ბათუმის ავტოტრანსპორტსა“ და „ჯი-თი მოტორსს“ შორის 2024 წლის 31 მაისს არის დადებული. მიკროავტობუსების მიწოდების ვადა კი 2024-2026 წლებია მითითებული.
ახალი მიკროავტობუსების ნაწილი ბათუმშია, ნაწილი გზაში, თუმცა „ბათუმელების“ ინფორმაციით, „ავტოტრანსპორტთან“ მიღება-ჩაბარების აქტი ჯერ გაფორმებული არ არის, რასაც შესაბამისი პროცედურები სჭირდება.
ახალი მიკროავტობუსები ბათუმის მერიის შპს „ბათუმის ავტოტრანსპორტის“ ტერიტორიაზე / 15.07.2024
როდიდან და რა მარშრუტზე ივლიან ახალი მიკროავტობუსები, ამ დროისთვის ინფორმაცია „ბათუმის ავტოტრანსპორტიდან“ ვერ მივიღეთ. თუმცა, „ბათუმელებს“ დაახლოებით 6 თვის წინ ბათუმის მერიაში გვითხრეს, რომ ქალაქში არსებული სამარშრუტო მიკროავტობუსების ჩანაცვლება არ იგეგმება და „ახალი მიკროავტობუსები სავარაუდოდ იმ მარშრუტებზე ივლიან, სადაც დღეს ჩვეულებრივი საქალაქო ავტობუსები არ დადიან].
„ბათუმის ავტოტრანსპორტს“ ავტობუსებისა და მიკროავტობუსების მძღოლების ასაყვანად ვაკანსიებიც აქვს გამოცხადებული [„სამუშაო გრაფიკი: სრული. ანაზღაურება: გამომუშავებით / მიკროავტობუსის მძღოლი – 1200 ლარამდე; ავტობუსის მძღოლი – 1700 ლარამდე].
ახალი მიკროავტობუსები ბათუმის მერიის შპს „ბათუმის ავტოტრანსპორტის“ ტერიტორიაზე
„ჯი-თი მოტორსისგან“ „ბათუმის ავტოტრანსპორტი“ 25 ავტობუსსაც იყიდის.
„2024-2026 წლების განმავლობაში შპს „ბათუმის ავტოტრანსპორტისთვის“ განკუთვნილი M2 კატეგორიის [100 ერთეული] და M3 კატეგორიის [25 ერთეული] ავტოსატრანსპორტო საშუალებების სახელმწიფო შესყიდვის კონსოლიდირებული ტენდერი“ სახელმწიფო შესყიდვების სააგენტოს ჰქონდა გამოცხადებული. მანამდე სააგენტო ფასების დასადგენად ბაზარს იკვლევდა.
ამ თემაზე:
