ქობულეთის საფეხბურთო სტადიონის ცენტრალურ და სავარჯიშო მოედნებზე ხელოვნურ საფარს დააგებენ. სამუშაოების ფარგლებში გარკვეული ინფრასტრუქტურული სამუშაოებიც ჩატარდება, თუმცა ეს არ იქნება სტადიონის რეკონსტრუქცია. სამუშაოებისთვის 2,1 მილიონი ლარია გათვალისწინებული.
აჭარის მთავრობას ქობულეთის სტადიონის რეკონსტრუქციის/ახლის მშენებლობის გადაწყვეტილება არ მიუღია. არადა აჭარის პროექტების მართვის კომპანია გასულ წელს ახალი, 7-8 ათას მაყურებელზე გათვლილი უეფას მე-2 კატეგორიის საფეხბურთო სტადიონის მოსაწყობად საჭირო ფასის დადგენაზე იკვლევდა ბაზარს. დღეს კი, კომპანიაში გვითხრეს, რომ ქობულეთში ახალი სტადიონის მშენებლობაზე გადაწყვეტილება ჯერ მიღებული არ არის და ამჯერად რეაბილიტაცია, ძირითადად, სათამაშო მოედნებს უტარდება.
„ჩელე არენას“ ცენტრალურ მოედანზე ბუნებრივი საფარი ისეთ მძიმე მდგომარეობაშია, რომ ამ ეტაპზე გადაწყდა ხელოვნური საფარის დაგება. ხელოვნური საფარი დაიგება სავარჯიშო მოედნებზეც, ეს არის ლოკალური სამუშაოები“ – გვითხრეს „აჭარის პროექტების მართვის კომპანიაში“.
ქობულეთში საფეხბურთო სტადიონის „ჩელე არენა“-ს ძირითადი და სავარჯიშო საფეხბურთო მოედნების სარეაბილიტაციო და ინფრასტრუქტურის სამუშაოებზე ტენდერი 2 107 504 ლარითაა გამოცხადებული.
ტენდერში წინადადებების მიღება 2024 წლის 28 ივლისს დაიწყება და 2 აგვისტოს დასრულდება.
პირობის მიხედვით „სამუშაოების სრულად დასრულების ვადაა ხელშეკრულების გაფორმებიდან 4 თვე“. ამასთან, „ვადის ცვლილების (გაზრდის) საფუძველს არ წარმოადგენს მეტეოროლოგიური მოვლენები, ასევე ობიექტის მიმდებარედ მიმდინარე სხვა სამუშაოები.“
ტენდერის პირობების მიხედვით:
„ტენდერში მონაწილე პრეტენდენტს [შესყიდვაში მონაწილეობის მსურველ პირს] 2018 წლის 1-ლი იანვრიდან ტენდერის გამოცხადებამდე პერიოდში არანაკლებ 1 დასრულებული ხელშეკრულების ფარგლებში შესრულებული [დასრულებული] უნდა ჰქონდეს არანაკლებ 90*60 ზომის სტადიონზე, არანაკლებ 14 000 Dtex სიხშირის მქონე World Rugby Preferred producer ან/და FIFA preferred provider ან/და FIH preferred provider პროგრამაში მონაწილე მწარმოებლის ხელოვნური საფარის მოწყობის სამუშაოები, ან/და არანაკლებ ერთი სტანდარტული ზომის სტადიონზე [არანაკლებ 100*64 ზომის] ბუნებრივი მოედნის მოწყობის სამუშაოები სრულად, სადრენაჟე სისტემის, მიწის სამუშაოებისა და საფარის მოწყობის ჩათვლით, რომლის ღირებულება უნდა შეადგენდეს არანაკლებ 300 ათას ლარს დღგ-ს ჩათვლით.
გამოცდილების დამადასტურებელი სამუშაო სავალდებულოდ მიწოდებული/განხორციელებული უნდა იყოს საქართველოს, ევროკავშირის (EU) ან OECD-ს წევრ სახელმწიფოთა ტერიტორიაზე“. პრეტენდენტის მიმართ არის სხვა მოთხოვნებიც.
„ყველა შესასრულებელი სამუშაოს საგარანტიო ვადაა 2 წელი, ხოლო ხელოვნური საფარის საგარანტიო ვადაა 5 წელი, რომელთა ათვლა იწყება მხარეთა შორის სამშენებლო სამუშაოებზე გაფორმებული საბოლოო მიღება-ჩაბარების აქტის დღიდან.“ – აღნიშნულია პირობაში.
რატომ არ გადაწყდა ამ დრომდე ქობულეთის სტადიონის რეკონსტრუქცია/ახლის აშენების საკითხი? – ამ კითხვაზე „ბათუმელებმა“ კონკრეტული პასუხი ვერ მიიღო. „რეკონსტრუქცია სავარაუდოდ შემდეგ დაიგეგმება“ – გვითხრეს აჭარის პროექტების მართვის კომპანიაში.
ბაზრის კვლევის დოკუმენტების მიხედვით როგორი უნდა იყოს ქობულეთის ახალი სტადიონი, ნახეთ ამ ბმულზე:
ქობულეთში უეფას მე-2 კატეგორიის სტადიონს ააშენებენ VIP შესასვლელითა და პარკინგით
