დღეს, 12 ივლისს, ბათუმში მშენებლობიდან არასრულწლოვანი ჩამოვარდა. „ბათუმელების“ ინფორმაციით, დაღუპული ახალგაზრდა 17 წლისაა.
მშენებლობა ლეონიძის ქუჩაზე მიმდინარეობს, სადაც ბათუმის რუსთაველის სახელმწიფო უნივერსიტეტის სტუდენტურ საერთო საცხოვრებელზე, სახურავის სარეაბილიტაციო სამუშაოები მიმდინარეობს.
სასწრაფო სამედიცინო სამსახურის ინფორმაციით, მათ არასრულწლოვანი ბიჭი ადგილზე მისვლისას გარდაცვლილი დახვდათ.
ბსუ-ს ინფორმაციით, სამშენებლო სამუშაოებს ტენდერში გამარჯვებული კომპანია „ალიგატორი 1“ აწარმოებს.
„ბათუმელები“ კომპანიის წარმომადგენელს, სოსო ჭელიძეს ესაუბრა. მისი თქმით, დაღუპული მოზარდი მისი ახლობელია, თუმცა ტრაგედიის დეტალები ამ ეტაპზე მისთვის უცნობია.
„არ ვარ ადგილზე, მოვდივარ და მალე გავერკვევი“, – ამბობს ჭელიძე.
შსს-ს ინფორმაციით, გამოძიება სსკ-ის 240-ე მუხლით მიმდინარეობს, რაც უსაფრთხოების წესის დარღვევას გულისხმობს სამთო, სამშენებლო ან სხვა სამუშაოს წარმოებისას.
