ბათუმის მერიის საქალაქო ინფრასტრუქტურისა და კეთილმოწყობის სამმართველომ ბათუმის მასშტაბით არსებული შენობების გამაგრება-აღდგენის სამუშაოებზე ტენდერი გამოაცხადა. შესყიდვა ლუკა ასათიანის ქუჩაზე ბათუმის მერიის მთავარი შენობის რეაბილიტაცია-გამაგრებასაც ითვალისწინებს.
შესყიდვის სავარაუდო ღირებულება 7 მილიონ 994 385 ლარია. წინადადებების მიღება 17 ივლისს იწყება და 19 ივლისს უნდა დასრულდეს.
ტენდერის პირობების მიხედვით, მიმწოდებელი ვალდებულია დავალების შემთხვევაში უზრუნველყოს ერთდროულად არანაკლებ სამ ობიექტზე მუშაობა. ასევე, მიმწოდებელი ვალდებულია, საჭიროების შემთხვევაში, ობიექტზე სამუშაოები აწარმოოს 24-საათიან რეჟიმში.
ლუკა ასათიანის #25-ში მდებარე მერიის შენობა კულტურული მემკვიდრეობის ძეგლია.
სპეციალისტების შეფასებით, „კლასიცისტურ სტილში შესრულებული ეს ნაგებობა განსაკუთრებით ღირებულია როგორც თავისი მხატვრული სახით – მონუმენტური, იმპოზანტური იერით, [რაც თავისი გარეგნობით, შესახედაობით ძლიერ შთაბეჭდილებას ახდენს] ასევე თავისი გამორჩეული ზომებითა და მასშტაბით. იგი მნიშვნელოვან, საკვანძო როლს თამაშობს არა მხოლოდ ამ ქუჩების, არამედ მთლიანად უბნის მხატვრული სახის და განაშენიანების ხასიათის ჩამოყალიბებაში“.
ძეგლზე სამუშაოების ნებართვას კულტურული მემკვიდრეობის სააგენტო გასცემს. სატენდერო დოკუმენტების მიხედვით, ძეგლის რესტავრაცია- გამაგრების პროექტი ჯერ მზად არ არის, შესაბამისად, სააგენტოს ნებართვა ვერ ექნება გაცემული.
სამმართველოს ინფორმაციით პროექტის მომზადება დაევალება ტენდერში გამარჯვებულს და მასვე ექნება ყველა შესაბამის ორგანოსთან შეთანხმების ვალდებულებაც.
