აჭარის ჯანმრთელობის დაცვის მინისტრი ნუგზარ სურმანიძე დღეს, 2 აგვისტოს პოლონეთიდან დაბრუნებულ ექიმებს შეხვდა.
აჭარის მთავრობისა და სილეზიის სავოევოდოს [პოლონეთი] მარშალის ოფისს შორის თანამშრომლობის, 2015-2016 წლების სამუშაო პროგრამის ფარგლებში აჭარის ონკოლოგიური ცენტრის სამი ექიმი სპეციალიზებული ტრენინგკურსის გასავლელად პოლონეთში იმყოფებოდა.
აჭარის ჯანმრთელობის დაცვის მინისტრის ნუგზარ სურმანიძის თქიმით, ჯანდაცვის სამინისტროს პრიორიტეტი სამედიცინო პერსონალის გადამზადება და კვალიფიკაციის ამაღლებაა.
ქიმიოთერაპევტი ხათუნა შოთაძე პოლონეთში ვიზიტის დადებით მხარეებზე გაგვესაუბრა.
„ჩვენი პოლონეთში გამგზავრების მიზანი უმთავრესად იყო პოლონელი კოლეგების გამოცდილების გაზიარება. ორი კვირის განმავლობაში ვიმყოფებოდით მარია სკლადოვსკაია კიურის ონკოლოგიურ ცენტრში, რომელიც ემსახურება არამარტო პოლონეთის მოსახლეობას, არამედ პაციენტებს სხვადასხვა ქვეყნიდან. ასე რომ პაციენტების ნაკადი იყო ძალიან დიდი. გვქონდა საშუალება თვალი გვედევნებინა პაციენტების მკურნალობის ტაქტიკაზე, ასევე გაგვეცნო პაციენტების მართვის სერვისი“ – ამბობს ხათუნა შოთაძე.
ხათუნა შოთაძე აღნიშნავს, რომ მათ კლინიკაში, ბათუმში, პაციენტების მკურნალობა მიმდინარეობს ევროპული სტანდარტების შესაბამისად, თუმცა მიუხედავად იმისა, პოლონეთში ძალიან დიდი ცოდნა და გამოცდილება შეიძინა, რასაც მომავალში აუცილებლად გამოიყენებს პროფესიულ საქმიანობაში.
პოლონეთში იმყოფებოდა კლინიკა „მედცენტრის“ მთავარი ექთანი გულო აბაშიძეც.
„მინდა გითხრათ, რომ ეს ჩვენი რეგიონის ექიმებისთვის იყო აუცილებელი. ბევრი რამ ვნახეთ, მუშაობის პროცესი ძალიან სასიამოვნო იყო. აღნიშნული კლინიკა ბევრად ვერაფრით განსხვავდება ქართულისგან, მაგრამ უნდა აღინიშნოს, რომ არის უფრო ფართომასშტაბიანი, იქ უფრო მეტი მუშაობაა“ – აცხადებს გულო აბაშიძე.
„აღნიშნული პროექტი პოლონეთში დაიწყო 2013 წლიდან. შევხვდით ადგილობრივ ხელისუფლებას, დავათვალიერეთ ის სამედიცინო ცენტრები, რომლებიც ჩვენს ინტერესს წარმოადგენდა, ერთ-ერთი იყო მარია სკლადოვსკა კიურის სახელობის ონკოლოგიური ცენტრი. ამ უკანასკნელში ყველა თანამედროვე აღჭურვილობაა, თანამედროვე ტექნოლოგიები, ამიტომ ჩვენ მათთან დავიწყეთ თანამშრომლობა“- განაცხადა ნუგზარ სურმანიძემ.
აგვისტოში აჭარიდან კიდევ ორი ექიმი გაემგზავრება პოლონეთში.
შეხვედრა ექიმებთან. ნაზი ბერიძის ფოტო
