ბათუმის საკრებულოს წევრის, პარტია „თავისუფალი დემოკრატების“ წარმომადგენლის, ნინო ბერაძის განცხადებით, საკრებულოს მიერ სამი თვის წინ მიღებული გადაწყვეტილება, რომელიც საბავშვო ბაღების თანამშრომლებისთვის 50-პროცენტიან მგზავრობის შეღავათს ითვალისწინებს, ამ დრომდე ადრესატამდე არ მისულა. საკრებულომ საშეღავათო ტარიფით სარგებლობის შესახებ დადგენილება 2016 წლის 20 აპრილს მიიღო.
„ეს ინიციატივა იყო „თავისუფალი დემოკარტების“, რომელიც გაითვალისწინა საკრებულომ და საბავშვო ბაღების თანამშრომლებს შესაძლებლობა მიეცათ, არსებული ტარიფის ნაცვლად, შეღავათიან ფასად, 15 თეთრად იმგზავრონ მუნიციპალური ტრანსპორტით“ – განაცხადა ნინო ბერაძემ.
მისი ინფორმაციით, ამ დადგენილების შემდეგ ბიუჯეტში 65 400 ლარი გამოიყო: „მერიის ჯანდაცვისა და სოციალური მომსახურების განყოფილებას აქვს სპეციალური პროგრამა, სადაც შეღავათიანი ტარიფით მოსარგებლეთა ორი კატეგორიაა განსაზღვრული, პირველი კატეგორია, რომელიც 100-პროცენტიან დაფინანსებას იღებს, მეორე კატეგორია – კი 50-პროცენტიანს. საბავშვო ბაღის თანამშრომლები სწორედ მეორე კატეგორიაში შევიდნენ. თუმცა, ეს ინფორმაცია მათთვის ამ ხნის განმავლობაში, არც საკრებულოს და არც მერიის შესაბამის უწყებებს არ უცნობებიათ“.
„ჩვენ ვესაუბრეთ საბავშვო ბაღის გამგეებს, თანამშრომლებს არ ჰქონდათ ინფორმაცია, ძალიან მცირე ნაწილს კი ბუნდოვანი ინფორმაცია აქვს“ – ამბობს საკრებულოს წევრი.
საკრებულოს იურისტის, სულიკო შვენთიძის განმარტებით, ბიუჯეტის ცვლილების პროექტი მერიამ წარმოადგინა: „მერიაში არსებობს განათლების განყოფილება, რომელსაც უნდა ეცნობებინა დადგენილების შესახებ საბავშვო ბაღების გაერთიანების ადმინისტრაციისთვის, იმას კი, თავის მხრივ, ინფორმაცია ბაღის თანმშრომლებზე უნდა მიეწოდებინა“.
საბავშვო ბაღების გაერთიანების ხელმძღვანელის კომენტარს „ბათუმელები“ მოგვიანებით შემოგთავაზებთ.
