ნურიგელის ტბასთან გამოკრული დიდი ტრაფარეტი მოქალაქეებს აფრთხილებს, რომ ტბაში თევზაობა აკრძალულია. აკრძალვის მიზეზი ტბაში მომწამვლელი წყალმცენარეების გაჩენა გახდა. მერიის ინფორმაციით, სანამ ტბის გაწმენდის პროცესი არ დასრულდება, მანამდე ტბაში თევზჭერა შეზღუდული იქნება. ამის მიუხედავად, მეთევზეები მერიის რეკომენდაციას არ ითვალისწინებენ და თევზაობენ.
„არ არის აკრძალული, რომ იყოს აქ არ გაგვაჩერებდნენ“ – გვეუბნება დავით არძენაძე. მის თქმით, თევზი მომწავლელი არ არის, ლაბორატორიის მიერააა შემოწმებული.
ტბასთან თევზაობს გრიგორ ტონიანიც: „მომწამვლელი ყვავილი ტბაში წელიწადში ერთხელ ყვავის, ეს პერიოდი გავლილია, ამიტომ თევზაობა უკვე შესაძლებელია“.
მერიის ტურისტული ობიექტების მართვის სააგენტოს ხელმძღვანელის ალექსანდრე თევზაძის ინფორმაციით, ტბაში თევზჭერაზე შეზღუდვები არ მოხსნილა.
„ბანერი გამოკრულია, სიტყვიერადაც ვაფრთხილებთ მაგრამ ჩვენს რეკომენდაციებს მაინც არ ითვალისწინებენ. ჩვენ ველოდებით სურსათის უვნებლობის სამსახურის დასკვნას, რომ ნამდვილად საზიანოა ამ ტბაში დაჭერილი თევზის საკვებად გამოყენება თუ არა, რადგან ტოქსინების მაღალი მაჩვენებელია ტბაში და შესაძლოა აქ დაჭერილმა თევზმა გამოიწვიოს მოწამვლა, სხვადასხვა ალერგიები, ასთმური პრობლემები და ა.შ. როცა დასკვნა ოფიციალურად გვექნება, ამ ინფორმაცისაც განვათავსებთ ტბასთან და დაუმორჩილებლობის შემთხვევაში, შესაძლოა სამართალდამცავებიც ჩავრიოთ“ – გვეუბნება ის.