21-23 ივნისს ბათუმში აფროსნობის ტურნირი გაიმართება, რომელშიც მონაწილეობას მიიღებენ ბათუმის, ფოთისა და თბილისის აფროსანთა კლუბები.
ტურნირის გახსნის საზეიმო ცერემონია, 21 ივნისს, 12 საათზე გაიმართება ე.წ. „მელკიმორიაზე“, ბაქოს ქუჩის 33-ში.
ტურნირის ორგანიზატორია აჭარის აფროსანთა ფედერაცია, რომელიც 2023 წელს დაფუძნდა. პრესრელიზის თანახმად, ფედერაციის მიერ ორგანიზებულ აფროსნობის სკოლაში, მოზარდებს საშუალება აქვთ უფასოდ დაეუფლონ სპორტის ამ სახეობას და მიიღონ ყველა საჭირო სერვისი, რაც მათ პროფესიულ ზრდაში დაეხმარება.
აფროსნობის ტურნირი ბათუმში პირველად გაიმართება 30-წლიანი პაუზის შემდეგ, ტურნირში პატარებთან ერთად, უფროსი ასაკის აფროსნებიც მიიღებენ მონაწილეობას.
ბათუმის აფროსანთა კლუბი-სკოლა, მოყვარულ მეთევზეთა კლუბ „დელფინის“ ინიციატივით დაფუძნდა, რომელიც ბათუმელ აფროსნებს აერთიანებს.
სკოლა აღჭურვილია აფროსნობისთვის საჭირო თანამედროვე წყალზე მცურავი ტექნიკითა და აპარატურით, რომლის მოდერნიზება ისევ გრძელდება.
აჭარის აფროსანთა ფედერაციის ცნობით, უახლოეს მომავალში ფედერაცია გეგმავს შეზღუდული შესაძლებლობის ბავშვების და მოზარდების სკოლაში მიღებას. შესაბამისი ინვენტარის შეძენაზე ზრუნვა, უკვე დაწყებულია. შესაბამისად, სპორტსმენებს საშუალება ექნებათ, მონაწილეობა მიიღონ პარასპორტულ ღონისძიებებში, საქართველოსა და საერთაშორისო ასპარეზზე.
ფედერაციის ცნობით, საქართველოში აფროსნობის განვითარებას საფუძველი ჩაეყარა XIX საუკუნის 90-იან წლებში და პირველი იახტკლუბი სწორედ ბათუმში გაიხსნა, უცხოელ დიპლომატთა და მეწარმეთა სახსრებით. ამ კლუბმა 1920-იან წლებამდე იარსება.
1924-30 წლებში ბათუმის საზღვაო სადგურის მეზღვაურთა ინიციატივით აფროსანთა არაერთი შეჯიბრება გაიმართა, 1931 წელს კი მოეწყო პირველი გაცურვა ბათუმიდან სოხუმამდე და უკან. მოგვიანებით საქართველოს აფროსნები „დ-1“და „ს-60“ ნავებით სევასტოპოლსა და ოდესაში ჩავიდნენ. 1994 წელს მოხდა ბათუმის აფროსანთა სკოლის შენობის დემონტაჟი და გაუქმდა კლუბიც, რამაც სპორტის ამ სახეობის განვითარება, ბათუმში რამდენიმე ათწლეულით შეაჩერა.
