გაზეთ „გურიის მოამბის“ რედაქტორი და „მთავარი არხის“ ჟურნალისტი, ვლადიმერ მენაბდე კრიმინალურმა პოლიციამ გამოკითხვაზე დაიბარა.
ლადო მენაბდე ამბობს, რომ გამოკითხვაზე დაბარების მიზეზი გახდა სოციალურ ქსელში გამოქვეყნებული ფოტო კონტრ-სნაიპერული შაშხანით, რომელიც მან 26 მაისს, დამოუკიდებლობის დღეს, ოზურგეთის ცენტრში გადაიღო სამხედრო ტექნიკის გამოფენაზე და გამოაქვეყნა ხუმრობის ტექსტით.
„მთლად საჩემო! ამერიკული – კონტრსნაიპერული შაშხანა ისვრის 18 სხვადასხვა დანიშნულების ტყვიის სახეობას! გამოიყენება სნაიპერების, ცოცხალი ძალისა და ჯავშანმანქანების წინააღმდეგ. მტერს ანადგურებს სამ კილომეტრზე მეტ მანძილზე. მოკლედ ჩემი სახლიდან მერიის, პოლიციის, სუსისა და პროკურატურის მაღალჩინოსნებს უპრობლემოდ „მოვიკითხავ“. ვხუმრობ თავისთავად“, – დაწერა ვლადიმერ მენაბდემ ფეისბუქზე ფოტოს გამოქვეყნებისას.
მან გვითხრა, რომ სურათზე შსს კრიმინალური პოლიციის დეპარტამენტმა აღძრა სისხლის სამართლის საქმე და იბარებენ თბილისში, გულუას ქუჩაზე, გამოკითხვაზე.
უწყებაში, რომელიც ჟურნალისტმა მიიღო, აღნიშნულია, რომ მას ცენტრალური კრიმინალური პოლიციის ორგანიზებულ დანაშაულთან ბრძოლის მთავარი სამმართველოს განსაკუთრებით მნიშვნელოვან საქმეთა საგამოძიებო სამმართველოს საგამოძიებო განყოფილება იბარებს გამოკითხვაზე.
ვლადიმერ მენაბდე ითხოვს გამოჰკითხონ მაგისტრი მოსამართლის თანდასწრებით. იგი გამოკითხვაზე დაბარებას თავის ჟურნალისტურ საქმიანობას უკავშირებს.
