სიახლეები

28 მაისს ბათუმში სტუდენტებისა და მოსწავლეების მარში გაიმართება – არა რუსულ კანონს

27.05.2024 •
28 მაისს ბათუმში სტუდენტებისა და მოსწავლეების მარში გაიმართება – არა რუსულ კანონს

ხვალ, 28 მაისს, 18 საათზე, ბათუმის შოთა რუსთაველის სახელმწიფო უნივერსიტეტის კიბეებთან ბათუმელი სტუდენტები და მოსწავლეები შეიკრიბებიან, რათა კიდევ ერთხელ გააპროტესტონ რუსული კანონი.

„ახლა თუ თქვენი სურვილით გაჩუმდებით, შემდეგ სხვა გაგაჩუმებთ“ – ვკითხულობთ განცხადებაში, რომელსაც სტუდენტური მოძრაობა „მარტიანელები“ ავრცელებს.

„მოღალატე დეპუტატებმა, შესაძლოა დაძლიონ ვეტო, თუმცა ვერ დაძლევენ ყველაზე დიდ ძალას, ქართველი ხალხის ერთობას.

შენი ვალია, შენი მეგობრების, შვილების, სტუდენტების, ლექტორების, მასწავლებლებისა და მოსწავლეების გვერდით იდგე, იცავდე თაობების სისხლით მოპოვებულ თავისუფლებას და წერდე ისტორიის იმ ფურცლებს, რომელსაც სიამაყით წაუკითხავენ მომავალ თაობებს.

ბათუმელებო, დებო და ძმებო, დადექით ახალგაზრდების გვერდით, იბრძოლეთ, არ დაიღალოთ და არ დაუშვათ, რომ დანებდეთ. თავისუფლებაზე დიდი და ღირებული ქართველთათვის არაფერი ყოფილა, გადადეთ ყველა საქმე, დღეს ყველას ერთი მიზანი გვაერთიანებს.

ბათუმმა ბევრჯერ აჩვენა ძლიერება, ბევრჯერ დაამტკიცა, რომ ქვეყნის გულისცემა ბათუმიდან იწყება, დროა ისევ გავერთიანდეთ და ვაჩვენოთ მსოფლიოს ჩვენი არჩევანი.

კი – ევროპას
არა – რუსეთს“ – წერია განცხადებაში.

აქციას შეუერთდებიან მოსწავლეებიც.

„მოსწავლეების ევროპული გაერთიანება“ მოუწოდებს ბათუმის საჯარო და კერძო სკოლების მოსწავლეებსა და მოსწავლეთა თვითმმართველობებს, 28 მაისს, 17:00 საათზე, კიდევ ერთხელ შეიკრიბონ 6 მაისის პარკის კოლონადებთან.

„დღეს დუმილი სირცხვილია! იბრძოლეთ თქვენთვის, ჩვენთვის და თავისუფალი მომავლისთვის! იბრძოლეთ ნათელი და ევროპული საქართველოსთვის! შემოუერთდით გაერთიანებული საქართველოს ისტორიის სწორ მხარესა და ნათელ მიზანს!

პროტესტს უერთდებიან (განახლებადი):

ქალაქ ბათუმის №1 საჯარო სკოლა;
ქალაქ ბათუმის №2 საჯარო სკოლა;
ქალაქ ბათუმის №3 საჯარო სკოლა;
ქალაქ ბათუმის №4 საჯარო სკოლა;
ქალაქ ბათუმის №6 საჯარო სკოლა;
ქალაქ ბათუმის №7 საჯარო სკოლა;
ქალაქ ბათუმის №8 საჯარო სკოლა;
ქალაქ ბათუმის №9 საჯარო სკოლა;
ქალაქ ბათუმის №10 საჯარო სკოლა;
ქალაქ ბათუმის №13 საჯარო სკოლა;
ქალაქ ბათუმის №14 საჯარო სკოლა;
ქალაქ ბათუმის №16 საჯარო სკოლა;
ქალაქ ბათუმის №18 საჯარო სკოლა;
ქალაქ ბათუმის ქართულ-ამერიკული სკოლა;
ქალაქ ბათუმის წმ. ანდრია პირველწოდებულის სახელობის სასულიერო გიმნაზია;
ქალაქ ბათუმის სკოლა ევრო – 2000“ – ვკითხულობთ განცხადებაში.

  • რა ხდება? 

საქართველოში მიმდინარე მრავალათასიანი საპროტესტო აქციების მიუხედავად, საქართველოს პარლამენტმა 14 მაისს რუსული კანონი მესამე მოსმენით დაამტკიცა. პრეზიდენტმა სალომე ზურაბიშვილმა ვეტო დაადო კანონს, ამჟამად პარლამენტი სწორედ ვეტოს დაძლევის საკითხს განიხილავს. „ოცნებას“ ხმების საკმარისი რაოდენობა აქვს პრეზიდენტის ვეტოს დასაძლევად.

შეგახსენებთ, რომ რუსული კანონი 2023 წლის მარტში მასობრივი პროტესტის შემდეგ „ოცნებამ“ უკან გაიწვია და პირობა დადო, რომ მას აღარასოდეს დაუბრუნდებოდა, თუმცა ერთი წლის შემდეგ „ოცნებამ“ კანონპროექტი უკან დააბრუნა.

ანალოგიურმა კანონმა რუსეთში გააქრო ყველა დემოკრატიული ინსტიტუტი და გაამყარა პუტინის რეჟიმი.

გადაბეჭდვის წესი


ასევე: