დღეს, 15 მაისს მოძრაობა „მარტიანელები“ რუსული კანონის წინააღმდეგ საპროტესტო აქციას ბათუმში 19:00 საათიდან აანონსებენ.
„პროტესტი და გაფიცვები გრძელდება! 19:00 შევიკრიბოთ ბსუ-ს კიბეებთან, წამოვიყვანოთ მეგობრები, ოჯახის წევრები, მეზობლები – დღეს ყველას ვალია იდგეს ქვეყნის ევროპული მომავლის სადარაჯოზე, დუმილი დანაშაულია!
გამოდი და დაგმე ქვეყნის შეცვლილი საგარეო კურსი, ძალადობა, სადარბაზოებთან ჩასაფრებული ზონდერები, მუქარის ზარები და ის, რამაც ამ ყველაფრამდე მიგვიყვანა – რუსული კანონი!
ჩვენი არჩევანი ევროპაა.“ – წერენ „მარტიანელები“ ფეისბუქის საკუთარ გვერდზე.
„მარტიანელები“ საპროტესტო აქციას რუსული კანონის წინააღმდეგ ბათუმში ყოველდღე მართავენ. აქვთ მსვლელობები, რა დროსაც მოქალაქეებს მოუწოდებენ შეუერთდნენ მათ და გააპროტესტონ რუსული კანონი.
გუშინ, 14 მაისს, სტუდენტების აქციას ათასობით მოქალაქე შეუერთდა. აქციას შეუერთდნენ ასევე სკოლის მაღალი კლასების მოსწავლეებიც.
აქციის მონაწილეები გუშინ, 14 მაისს მსვლელობისას ადმინისტრაციულ შენობებთანაც მივიდნენ, მათ რუსული კანონი გააპროტესტეს აჭარის მთავრობის სახლთან, ბათუმის მერიასთან და აჭარის უმაღლეს საბჭოსთან.
მიუხედავად იმისა, რომ აქციებისა და დაკავებების ფონზე საქართველოს პარლამენტმა რუსული კანონი მესამე მოსმენით გუშინ 14 მაისს დაამტკიცა, აქციის მონაწილეები გამოსვლების შეწყვეტას არ აპირებენ და აცხადებენ, რომ არ შეეგუებიან საქართველოს კურსის ცვლილებას.
სტუდენტების ანტირუსული აქცია განახლდება ქვეყნის დედაქალაქშიც.
- რა ხდება
საქართველოს დიდ ქალაქებში ერთ თვეზე მეტია მიმდინარეობს პროტესტი „რუსული კანონის“ წინააღმდეგ, რომელიც „ქართულმა ოცნებამ“ უპირობოდ გაწვევის დაპირების მიუხედავად დააბრუნა პარლამენტში.
