რა ზიანს მოუტანს „ქართული ოცნების“ რუსული კანონი საქართველოს დემოკრატიას, სახელმწიფოებრიობას და ქვეყნის ევროინტეგრაციას – ამ თემაზე „ბათუმელები“ მასწავლებლის ეროვნული ჯილდოს მფლობელს, მეკეიძეების საჯარო სკოლის ინგლისურის მასწავლებელს, როლანდ შავაძეს ესაუბრა.
როლანდ შავაძე, გასული წლის მარტის აქციებზეც აპროტესტებდა რუსულ კანონს, რადგან მიიჩნევს, რომ ეს კანონი ქვეყნის უკუსვლისკენ არის მიმართული და საფრთხეს უქმნის მთელ ქვეყანას.
„ამ კანონის წინააღმდეგ გასულ წელს მეც ვიდექი მარტის აქციებზე იმ ადამიანების გვერდით, რომლებიც რუსულ ინიციატივას აპროტესტებდნენ.
ახლა, თითქოს სახელწოდებაში მცირედი ცვლილება შეიტანეს, მაგრამ შინაარსი იგივეა, რაც წინა შემთხვევაში იყო. ამ კანონით ხელისუფალს შეეძლება საქართველოს მტრად და უცხოური ძალის აგენტად გამოაცხადოს ნებისმიერი ორგანიზაცია თუ ინდივიდი, რომელიც, უბრალოდ, მოესურვება.
მაგალითად, აშშ-ის საელჩოს და „ერაზმუსის“ გაცვლითი პროგრამებით არაერთხელ ვყოფილვარ უცხოეთში საგანმანათლებლო მიზნებიდან გამომდინარე. ძალიან მარტივია, ამ კანონის საშუალებით ყველას, ვინც საერთაშორისო პროექტებში ვმონაწილეობთ, აგენტების იარლიყი დაადონ და საზოგადოების ნაწილში ყველა პროგრესული ადამიანი აგენტად გამოაცხადონ.
პარადოქსულია ისიც, რომ მმართველი პარტიის ლიდერები თავად იყვნენ საქართველოში მოქმედი საერთაშორისო ორგანიზაციების ხელმძღვანელები.
საქართველოს გაცხადებული პოზიციაა, რომ აშშ და ევროპული ქვეყნები ჩვენი მოკავშირეები არიან. ამ კანონით ხელისუფლება მათ რეალურად ეუბნება, რომ თქვენ საშიში ხალხი ხართ და ვერ გენდობით.
დასავლეთის პოზიციაც ძალიან მკაფიო იქნება – თუ კი ჩვენგან დახმარება არ გსურთ და საშიშ ხალხად მიგვიჩნევთ, კარგად ბრძანდებოდეთო გვეტყვიან. იმათ არაფერი აქვთ სახვეწარი, ეს ჩვენ გვჭირდება მათთან სიახლოვე.
ასეთმა კანონმა რუსებს მონური მორჩილება მოუტანა. პუტინის რეჟიმი ბევრს არ მოსწონს და ხმას ვერ იღებენ. რუსი ოლიგარქები და მათი გარემოცვა ფუფუნებაშია, ხოლო რიგითი ადამიანები დამონებული ემსახურებიან ოლიგარქიულ ძალებს.
ეს იმიტომ, რომ მსგავსი კანონით პუტინმა ჩაკლა კრიტიკული შეხედულებები, ჯანსაღი მედია, განსხვავებული აზრის მქონე ყველა ინდივიდი მორალურად და ფიზიკურად გაანადგურა.
„ქართულ ოცნებას“ პირველად არ უთქვამს ტყუილი. გასაკვირი არც ეს მორიგი ტყუილია.
შარშან მარტის აქციებზე გამოსული საზოგადოების შედეგია ამ კანონის უკან გაწვევა. ეს იყო ერთგვარი ტესტი საზოგადოების რეაქციაზე.
წლევანდელი მცდელობით კი სურთ მორალურად გატეხონ საზოგადოება, რათა ისარგებლონ სისუსტით და შეიქმნან მათთვის სასათბურე პირობები.
იმედია, ხელისუფლება იაზრებს, რომ ქართველი ხალხის ბუნება რუსული მენტალობისგან განსხვავებულია და მონობას ქართველი ერი არ შეეგუება. ამის ისტორიული გამოცდილებაც გვაქვს. შესაბამისად, ეს კანონპროექტი ამ ქვეყანაში კანონად ვერ იქცევა.
ჩვენს თანამოქალაქეებს მინდა მოვუწოდო კვლა, რომ ერთიანობის დროა. არ უნდა დავიღალოთ და ხელისუფლებას არ მივცეთ ჩვენი ქვეყნის ევროპული რელსებიდან გადაყვანის საშუალება“.
