სიახლეები

7 წლის ბარბარეს დიაგნოზი ვერ დაუსვეს – უცხოეთში შვილის წასაყვანად მშობელი დახმარებას ითხოვს

28.03.2024 • 4497
7 წლის ბარბარეს დიაგნოზი ვერ დაუსვეს – უცხოეთში შვილის წასაყვანად მშობელი დახმარებას ითხოვს

7 წლის ბარბარე აბაშიძეს აუტისტური სპექტრის აშლილობა 2 წლის ასაკში დაუდგინდა და უტარდებოდა თერაპია. ბარბარეს ბოლო სამი წელია დაეწყო დაუზუსტებელი წარმომავლობის ართრიტი. თავიდან უბრალოდ ფეხს იტკიებდა, მერე კი ნელ-ნელა საერთოდ შეწყვიტა სიარული. სისტემურად დაზიანდა შემაერთებელი ქსოვილები.

ყველაფერს თან დაერთო D ვიტამინის მწვავე დეფიციტი, რკინადეფიციტური ანემია და ასევე დაუზუსტებელი წარმომავლობის ეპილეფსია.

ბარბარეს მეტყველებით კომუნიკაციის დამყარება არ შეუძლია. ვერ საუბრობს და, შესაბამისად, ვერ აგებინებს მშობლებს და ექიმებს რა და როგორ სტკივა. ამას მხოლოდ მინიშნებებით აკეთებს.

ექიმები ვარაუდობენ, რომ ამ ყველაფერმა ნერვული სისტემის მწვავე დაზიანებაც გამოიწვია. ბარბარე ახლა თბილისის იაშვილის სახელობის კლინიკის რეანიმაციაშია. კრუნჩხვების, პერიოდული გულყრების და მწვავე ცხელების ფონზე მდგომარეობა უარესდება, შეუძლებელია გადასხმების გაკეთება, რადგან ბარბარეს ვენები ამის შესაძლებლობას აღარ იძლევა.

კლინიკამ გასცა ცნობა, რომ ბავშვს დიაგნოზს ვერ უსვამენ, ვერ ირკვევა, რამ გამოიწვია ყველაფერი და გასცემენ პაციენტის საზღვარგარეთ გადაყვანის რეკომენდაციას, სამკურნალოდ.

„ბარბარეს სჭირდება ფართომასშტაბიანი და ბევრი კვლევა, თურქეთის კლინიკამ გამოგვიგზავნა ჯერჯერობით მხოლოდ 4 საწყისი ანალიზის ხარჯთაღრიცხვა, რაც 6200 დოლარია.

აჭარის ჯანდაცვის სამინისტრო დაგვიფინანსებს ამ კვლევებს, მკურნალობის პროცესი მერე იწყება და  მინიმუმ 20 ათასი დოლარის მობილიზება მაინცაა საჭირო ბარბარეს სამკურნალოდ საწყის ეტაპზე. სულ რა თანხა იქნება საჭირო მკურნალობისთვის ჯერ ჩვენ არ ვიცით“, – ამბობს ბარბარეს დედა, ხატია ჩხაპელია.

ბარბარე აბაშიძე

ოჯახს კომუნიკაცია სტამბოლის ლივის კლინიკის ექიმებთან აქვს.

იაშვილის კლინიკის ექიმები ცდილობენ ბავშვის მდგომარეობა დაასტაბილურონ ისე, რომ  ბავშვის გადაყვანა ჩვეულებრივი თვითმფრინავით უსაფრთხო იყოს.

7 წლის ბარბარე ახლა რეანიმატოლოგების მეთვალყურეობის ქვეშაა. ყველა სახსარში განვითარებული ანთებითი პროცესის გამო ბავშვს სახსრებში წყალი უდგება, რაც ასევე საჭიროებს თურქეთში ცალკე კვლევებს.

ტკივილების ფონზე, როცა ბარბარე ექიმებთან ვერ ამყარებს კომუნიკაციას, ბავშვის ისტერიკა უმართავი ხდება. ტირის, ყვირის და ბრაზობს.

იაშვილის კლინიკაში ყოფნის პერიოდს სახელმწიფო ნაწილობრივ უფინანსებს ოჯახს, ნაწილს კი თავად იხდიან.

„როცა კლინიკაში ვაწვენთ ბავშვს, რაღაც პროცენტს აფინანსებს სახელმწიფო, რაღაც პროცენტს ვიხდით ჩვენ. მაგრამ როცა მიგვყავს გამოკვლევებზე სხვადასხვა ექიმთან, ყველგან ვიხდით თანხის 100%-ს.

10 000 ლარზე მეტი დავხარჯეთ უშედეგო მკურნალობაში და მდგომარეობა გაუმჯობესების ნაცვლად გართულდა. ყველანაირი წყარო გადაგვეწურა“, – ამბობს ბარბარეს დედა.

აუტისტური სპექტრის გეგმიურ თერაპიებს თუ არ ჩავთვლით, ბარბარეს უკვე 3 წელია ზემოთჩამოთვლილი პრობლემების გამო მკურნალობენ. თერაპიებზე კი საუბარიც ზედმეტია ჯერ. დიაგნოზის და ტკივილების წარმომავლობის დაუდგენლობამ ყველა პრობლემა უფრო და უფრო გაამწვავა. იყო შემთხვევა როცა ბარბარეს გული გაუჩერდა, ყველანაირი მონაცემი დაეცა და რეანიმაციაში 18 დღიანი ბრძოლის შემდეგ მომჯობინდა.

ოჯახს ბავშვის გადარჩენის იმედი გადაწურული ჰქონდა, მაგრამ ბარბარემ მაშინ კრიზისი დაძლია და გადარჩა.

ოჯახი ახლა საზოგადოების დახმარების იმედადაა.


 

ანგარიშს ნომრები:

საქართველოს ბანკი: GE89BG0000000155154200 – მიმღები ნათია ჩხაპელია, ბარბარეს დეიდა

თი ბი სი ბანკი: GE44TB7261345064300054 – მიმღები ნათია ჩხაპელია

გადაბეჭდვის წესი


ასევე: