„თავისუფალი დემოკრატების“ მაჟორიტარობის კანდიდატები საქართველოს პარლამენტში ნუგზარ ვარშანიძე და ნინო ბერაძე იქნებიან. მესამე კანდიდატი პარტიას ჯერ არ დაუსახელებია.
„თავისუფალი დემოკრატების“ წევრი, კობა ჩხეიძე, რომელიც „ბათუმელების“ ინფორმაციით, სიის პირველი ნომერი და ბათუმის მაჟორიტარობის კანდიდატი იქნება აჭარის უმაღლეს საბჭოში აცხადებს, რომ, საარჩევნო სუბიექტების პრეზენტაცია უახლოეს დღეებში ექნებათ და ყველა კანდიდატის ვინაობა მაშინ გახდება ცნობილი.
„ჯერ-ჯერობით საქართველოს პარლამენტში მაჟორიტარობის ორი კანდიდატი დავასახელეთ. ნინო ბერაძე ბათუმის საკრებულოს წევრია, ნუგზარ ვარშანიძე კი ინჟინერი. ოჯახით არის პოეტ მამია ვარშანიძის შვილი, თვითონ კი პროფესიონალი რკინიგზელია. რკინიგზის სადგურის გადატანა ბათუმში მისი პროექტის მიხედვით მოხდა, რკინიგზის ახალი სადგურიც მისი დაპროექტებულია“.
ნინო ბერაძე
კობა ჩხეიძის ინფორმაციით, ნუგზარ ვარშანიძე პოლიტიკაში აქამდე არ ყოფილა, „გარკვეული ხნის წინ მოვიდა და გაწევრიანდა ჩვენს პარტიაში“-გვეუბნება ის.
ნუგზარ ვარშანიძე
ნუგზარ ვარშანიძე 2004 საქართველოს რკინიგზის დეპარტამენტის ბათუმის ტერიტორიული სამმართველოს უფროსად მუშაობდა. როგორც ნუგზარ ვარშანიძე გვეუბნება, ის 2004 წლის მარტში ასლან აბაშიძემ დააკავა. „ნაციონალურ მოძრაობას“ ეხმარებაო და ეს იყო მიზეზი, თუმცა ოფიციალურ მოტივად ფინანსური დარღვევები დაასახელეს. შემდეგ, ვარდების რევოლუციის შემდეგ, როცა ხელისუფლება შეიცვალა, გამათავისუფლეს, თუმცა ძალიან მალე, სააკაშვილის ხელისუფლებამ დამაკავა იმ მოტივით რომ „ასლან აბაშიძის გუნდის წევრი ვიყავი“. ოფიციალური ბრალდება იგივე იყო, რაც აბაშიძის დროს. თუმცა, რამდენიმე თვეში საპროცესო გარიგების საფუძველზე გამათავისუფლეს“- გვეუბნება ნუგზარ ვარშანიძე.
ამჟამად, მაჟორიტარობის კანდიდატი კერძო ბიზნესითაა დაკავებული: „სამშენებლო მასალების ბიზნესი მაქვს თბილისში“.
