დღეს 18 ივლისს, აჭარის უმაღლესმა საბჭომ ახალი მინისტრთა კაბინეტი დაამტკიცა.
უმაღლესმა საბჭომ კენჭი უყარა ზურაბ პატარაძის მიერ წარდგენილ მინისტრობის კანდიდატებს: ნუგზარ სურმანიძე, გიორგი თავამაიშვილი [ყოფილი მინისტრები], რამაზ ბოლქვაძე და ლაშა კომახიძე. პოსტი ვერ შეინარჩუნა აჭარის ფინანსთა და ეკონომიკის ყოფილმა მინისტრმა დავით ბალაძემ და სოფლის მეურნეობის მინისტრმა ზაურ ფუტკარაძემ.
ფინანსთა და ეკონომიკის ახალ მინისტრად, ყოფილი მინისტრის მოადგილე, რამაზ ბოლქვაძე, ხოლო სოფლის მეურნეობის მინისტრის პოსტზე ლაშა კომახიძე წარადგინეს, რომელიც მანამდე ევროკავშირისა და გაეროს განვითარების პროგრამის „ენპარდ აჭარას“ პროექტის მენეჯერი იყო. ნუგზარ სურმანიძე აჭარის ჯანდაცვის მინისტრად გააგრძელებს მუშაობას, ხოლო გიორგი თავამაიშვილი განათლებისა და კულტურის მინისტრად.
უმაღლესი საბჭოს იურიდიულ და საპროცედურო საკითხთა კომისიის თავმჯდომარის თემურ კახიძის ინფორმაციით, კენჭისყრაში 19 დეპუტატი მონაწილეობდა. აქედან 12-მა მხარი დაუჭირა მინისტრთა კაბინეტის ახალ შემადგენლობას, შვიდი წინააღმდეგი იყო, ერთმა დეპუტატმა, – მედეა ვასაძემ კენჭისყრაში მონაწილეობა არ მიიღო. ერთი დეპუტატი თემურ ბოლქვაძე კი სხდომას არ ესწრებოდა.
ოფიციალური ინფორმაციით, აჭარის მთავრობის ახალი მინისტრთა კაბინეტი, დამტკიცებულია.
აჭარის ახალი მინისტრთა კაბინეტი. მარცხნიდან: ლაშა კომახიძე, რამაზ ბოლქვაძე, გიორგი თავამაიშვილი, ნუგზარ სურმანიძე
