2024 წლის ერთიან ეროვნულ გამოცდებზე რეგისტრაცია 4 მარტს დაიწყება.
გამოცდების ცენტრის ინფორმაციით, საგამოცდო ცენტრები კვლავ გაიხსნება: თბილისში, რუსთავში, თელავში, გორში, ზუგდიდში, ქუთაისში, ფოთში, ოზურგეთში, ბათუმში, ახალციხეში, ხულოსა და ამბროლაურში.
რეგისტრაციის პროცესი წელსაც რამდენიმე ეტაპად იქნება შესაძლებელი.
ძირითად ეტაპზე – 4 აპრილის 18:00 საათამდე გამოსაცდელმა უნდა შეავსოს პირადი მონაცემები, აირჩიოს საგამოცდო ქალაქი, ჩასაბარებელი საგნები. ამ ვადის ამოწურვის შემდეგ გამოსაცდელი გამოცდებზე ვეღარ დარეგისტრირდება.
საგნის შეცვლა ან დამატება, ასევე გამოცდის ენის შეცვლა გამოსაცდელებს 15 აპრილის 18:00 საათამდე შეეძლებათ.
საგანმანათლებლო პროგრამების ჩამონათვალში ცვლილებების შეტანის შესაძლებლობა კი მათ აპელაციის შედეგების გამოქვეყნებიდან მომდევნო დღის ჩათვლით ექნებათ.
შეფასებისა და გამოცდების ცენტრის განმარტებით, აბიტურიენტებს კვლავ შეეძლებათ სასურველი რაოდენობის იმ საგანმანათლებლო პროგრამების არჩევა, რომლებზეც მათ მიერ არჩეული საგნები ბარდება.
საერთო სამაგისტრო გამოცდისათვის, ასევე სტუდენტთა საგრანტო კონკურსისათვის, რეგისტრაციაც 4 მარტს დაიწყება.
ცენტრის განცხადებით, იმ პირებისთვის, რომლებიც წელს მასწავლებლის გამოცდაზე გასვლას გეგმავენ, რეგისტრაციის თარიღები მოგვიანებით გახდება ცნობილი.
