რეკლამა,სიახლეები

„აჭარისწყალი ჯორჯია“ მხარს უჭერს აჭარაში მცხოვრებ მეწარმე ქალების ინიციატივებს

28.02.2024 • 5764
„აჭარისწყალი ჯორჯია“ მხარს უჭერს აჭარაში მცხოვრებ  მეწარმე ქალების ინიციატივებს

„სოციუმი“ – ასე ეწოდება  კაფეს, რომელიც ბათუმში, ჟორდანიას 4 ნომერში გაიხსნა. ახალ სივრცეში აჭარაში მცხოვრებ ქალთა, მათ შორის შშმ პირთა, ხელნაკეთი ნივთებია გამოფენილი. კაფეში პერიოდულად იმართება სხვადასხვა ტექნიკით დამზადებული დეკორატიული თუ ყოველდღიური მოხმარების ხელნაკეთი ნივთების გამოფენა-გაყიდვაც.

„სოციუმმა“ თებერვალში, „აჭარისწყალი ჯორჯიას“ ფინანსური მხარდაჭერით,  ერთ-ერთ ასეთ გამოფენა-გაყიდვას უმასპინძლა.

ღონისძიებაზე მეწარმე ქალებისა და მათი პროდუქციის გასაცნობად სტუმრები ,,მშვიდობის, დემოკრატიის და განვითარების კავკასიურმა ინსტიტუტმა“ მოიწვია, რომელმაც საერთაშორისო ორგანიზაციის „პური მსოფლიოსთვის“ მხარდაჭერით ამ მეწარმე ქალების გასაძლიერებლად ახალი ორგანიზაცია – „მხარდაჭერისა და შესაძლებლობის განვითარების ცენტრი“ დააფუძნა. ორგანიზაციის მართვაში სწორედ ეს მეწარმე ქალები იქნებიან ჩართულნი.

ორგანიზაციის წარმომადგენლის, ციალა ქათამიძის თქმით, ეს არ არის ერთჯერადი გამოფენა და სამომავლოდ დაგეგმილია უფრო ფართომასშტაბიანი ღონისძიებები:

„ჩვენი მიზანია, ქალებს, მათ შორის შშმ პირებს, რომლებიც ხელნაკეთ ნივთებს ამზადებენ და არ აქვთ შესაძლებლობა თავიანთი ნამუშევრები წარუდგინონ შედარებით ფართო საზოგადოებას, ვეხმარებით, ჰქონდეთ ხელმისაწვდომი როგორც სოციალური ქსელები, ასევე სივრცე, სადაც განათავსებენ პროდუქციას და მოსინჯონ საკუთარი ძალები ამ სოციალურ-ეკონომიკურ მოცემულობაში. ვთვლით, რომ ქალების გაძლიერების ერთ-ერთი მთავარი ინდიკატორი სწორედ ეკონომიკური მდგრადობა და სტაბილურობაა.

გამოფენა-გაყიდვაზე „აჭარისწყალი ჯორჯიას“ წარმომადგენელმა ნინო დიასამიძემ მხარდაჭერა გამოუცხადა მაღალმთიან აჭარაში მცხოვრებ ქალებს მათი ინიციატივების განხორციელებისთვის და ხელსაქმისთვის საჭირო მასალებიც გადასცა საჩუქრად.

„ჩვენი კომპანია – აჭარისწყალი ჯორჯია მხარს უჭერს ადგილობრივი ქალი მეწარმეების გაძლიერებას. ხულოსა და შუახევის მუნიციპალიტეტებთან ერთად განვახორციელეთ ადგილობრივი ქალების სოციალურ-ეკონომიკური გაძლიერების პროექტი და დღევანდელი შეხვედრაც ერთგვარი გაგრძელებაა ამ ინიციატივისა. მოხარული ვარ და მინდა წარმატება ვუსურვო მონაწილეებს. იმედი მაქვს, რომ მსგავსი ღონისძიებები უფრო მასშტაბურ სახეს მიიღებს“, – გვითხრა ნინო დიასამიძემ.

23 მარტს დაგეგმილია  უფრო დიდი გამოფენა-გაყიდვა, რომლის მიზანია, როგორც ამ ქალებისა და შშმ პირების შესაძლებლობების პრეზენტაცია, ასევე ბაზის შექმნა, რომელიც მათ მისცემთ სამომავლო კოლაბორაციის საშუალებას. შეიქმნება ასევე საიტი, სადაც მათი ნამუშევრები განთავსდება და გაიყიდება.

გადაბეჭდვის წესი


ასევე: