შემოსავლების სამსახურის ცნობით, ბოლო ერთი თვის მონაცემებით, სარფისა და ნინოწმინდის საბაჟო გამშვებ პუნქტებზე დიდი ოდენობით არადეკლარირებული სიგარეტის საზღვარზე კანონდარღვევით შემოტანის მცდელობის ფაქტები აღიკვეთა.
სამსახურის ინფორმაციით, მებაჟე ოფიცრებმა, სხვადასხვა ქვეყნის მოქალაქეების ბარგისა და მათი ავტომანქანების ეჭვის საფუძველზე დეტალური დათვალიერების შედეგად ჯამში – 58 996 ღერი არადეკლარირებული სიგარეტი და 1,5 კილოგრამი თამბაქო აღმოაჩინეს.
საქართველოს საბაჟო კოდექსის 168-ე მუხლის მე-3 ნაწილის შესაბამისად, კანონდამრღვევ მოქალაქეებს სანქციის სახით ჩამოერთვათ საქონელი და თითოეულს შეეფარდა ფულადი ჯარიმა, 1000 ლარის ოდენობით, ხოლო 3 კანონდამრღვევ მოქალაქეს ჩამოერთვა საქონელი და ვინაიდან ქმედება იყო განმეორებითი, თითოეულს ფულადი ჯარიმა – 3000 ლარის ოდენობით შეეფარდა.
