რუსეთის შინაგან საქმეთა სამინისტრო ინიციატივით გამოდის, რუსეთში ჩასული უცხოელებისთვის „ლოიალურობის შეთანხმება“ შემოიღონ – წერს „მედუზა“.
თავის მხრივ, უცხოელი ამ შეთანხმებით ვალდებულებას იღებს, არ დაარღვიოს „რუსეთის ეროვნული ინტერესების დაცვისთვის შემოღებული“ აკრძალვები. რუსეთის შსს-ის შეთავაზება გულისხმობს, რომ უცხოელებს რუსეთში ყოფნისას, მათ შორის, აეკრძალებათ:
- რუსეთის შიდა და საგარეო პოლიტიკის, ასევე ხელისუფლების ორგანოებსა და მათი თანამდებობის პირების ნებისმიერი ფორმით დისკრედიტაცია;
- ინფორმაციის თავისუფლების უფლების ბოროტად გამოყენება, და ისეთი ცნობების გავრცელება, რომელიც ამცირებს, ან [სხვას] მოუწოდებს, უარყოს კონსტიტუციურად მნიშვნელოვანი ზნეობრივი ღირებულებები, მათ შორის — ქორწინება, როგორც ქალისა და კაცის ერთობა;
- „არატრადიციული სექსუალური ურთიერთობების პროპაგანდა“;
- „ისტორიული სიმართლის დამახინჯება სამშობლოს დაცვაში საბჭოთა ხალხის გმირობაზე და მის წვლილზე ფაშიზმის დამარცხებაში“.
თუკი კანონპროექტი მიიღეს, რუსეთში შესვლისას უცხოელს მოუწევს დაეთანხმოს, რომ არ გამოავლენს უპატივცემულობას ტრადიციული რუსული სულიერ-ზნეობრივი ღირებულებების მიმართ.
ამ ეტაპზე უცნობია, როდის, ან საერთოდ თუ შევა კანონპროექტი რუსეთის სახელმწიფო დუმაში. პირველად ანალოგიური კანონის მიღების იდეა 2021 წელს გაჩნდა.
