რუსეთის ძალებმა მკვეთრად გაზარდეს იერიშებისა და ავიადაბომბვების რაოდენობა ავდიივკას მიმართულებაზე, იტყობინება „უკრაინსკა პრავდა“ ადგილზე მოქმედი ოპერატიულ-სტრატეგიული დაჯგუფების, „ტავრიას“ ხელმძღვანელის, ოლექსანდრ ტარნავსკიზე დაყრდნობით.
ტარნავსკის განცხადებით, რუსეთმა ამ მიმართულებაზე ჩაატარა 1 სარაკეტო და 29 ავიადარტყმა, 38-ჯერ შევიდა ბრძოლაში და 911-ჯერ დაიწყო არტილერიული დაბომბვა.
„გაიზარდა მტრის დანაკარგი ცოცხალ ძალასა და ჯავშანტექნიკაში. ჩვენი მცველები მედგრად იცავენ თავს ავდიივკას მიმართულებაზე“, – ამბობს ის.
უკრაინული მხარის ცნობით, „ტავრიას“ მოქმედების ზონაში რუსეთის დანაკარგებია 491 ჯარისკაცი. კიდევ შვიდი ტყვედ ჩაბარდა უკრაინელებს.
რაც შეეხება ტექნიკას, ტარნავსკის თქმით, განადგურებულია რუსეთის სამი ტანკი, ერთი ანტისატანკო-სარაკეტო კომპლექსი, ექვსი დრონი, ოთხი ავტომანქანა და ოთხი სხვადასხვა სახის სპეცტექნიკა. ასევე, განადგურებულია ტყვია-წამლის სამი საწყობი.
