მთავარი,სიახლეები

აქცია ბათუმში – რას ითხოვს ბაგრატიონის 127-ში მცხოვრები მოსახლეობა

22.11.2023 • 843
აქცია ბათუმში – რას ითხოვს ბაგრატიონის 127-ში მცხოვრები მოსახლეობა

დღეს, 22 ნოემბერს, ბათუმში აქციას მართავს ბაგრატიონის N127-ში მცხოვრები მოსახლეობა.

ამ მისამართზე მდებარეობს ავარიული კორპუსი, სადაც მცხოვრებ მოსახლეობას, სულ 128 ოჯახს, არაერთი პრობლემა აქვს, რაც აქციის მიზეზი გახდა.

მოსახლეობის თქმით, გარდა იმისა, რომ მათი სახლი ავარიულ მდგომარეობაშია, მას შემდეგ, რაც სამშენებლო კომპანია „ორბმა“ აქ მშენებლობა დაიწყო, სახლზე დამატებითი ბზარები გაჩნდა, სახლი ირყევა და აქ ცხოვრება კიდევ უფრო სახიფათო ხდება.

გარდა ამისა, მოსახლეობის თქმით, „ორბი“ მშენებლობის საძირკვლიდან ტექნიკურ წყალს ქაჩავს და  მათ ეზოში უშვებს, რის შედეგადაც ავარიული კორპუსის სარდაფი წყლით ივსება.

მოსახლეობა ამბობს, რომ სახლის ავარიულობის გარდა რამდენიმე მნიშვნელოვანი პრობლემა აქვთ, რის მოგვარებასაც საკუთარი ძალებით ვერ შეძლებენ.

ერთ-ერთი ასეთი პრობლემაა მოშლილი საკანალიზაციო სისტემა, რომელიც სარდაფში ჟონავს. გარდა ამისა, კორპუსს არ აძლევენ გაზის შეყვანის უფლებას.

აქ გვითხრეს, რომ გაზის მილი კორპუსთან არჩევნების წინ მიიყვანეს, თუმცა შემდეგ სამუშაოები შეჩერდა და ახლა ბაგრატიონის 127-ში მცხოვრები მოსახლეობის ნაწილი შეშის ღუმელით თბება, რაც დამატებით ხარჯებთანაა დაკავშირებული, დიდია ელექტროენერგიის გადასახადიც, სახლში კი ბევრი სოციალურად დაუცველი ცხოვრობს.

აქციაზე „ბათუმელებს“ უთხრეს, რომ აქციის შეწყვეტას არ აპირებენ მანამ, სანამ მათთან ბათუმის მერიიდან არ მივა მაღალჩინოსანი, გადაწყვეტილების მიმღები პირი, რომელიც მათ კონკრეტულ ვადასა და პრობლემების მოგვარების გზაზე დაელაპარაკება. წინააღმდეგ შემთხვევაში, მოსახლეობა ამბობს, რომ გზას გადაკეტავენ.

აქციის მიმდებარედ იმყოფება პოლიციის ერთი ეკიპაჟი.

ამავე თემაზე:

„გადავკეტავთ ქუჩას“ – ბათუმში ავარიულ სახლში მცხოვრებლები დახმარებას ითხოვენ

 

გადაბეჭდვის წესი


ასევე: