შავ ზღვაში, თურქეთის სანაპიროსთან, ქარიშხლის გამო სატვირთო გემი ჩაიძირა.
ოფიციალური ინფორმაციით, თურქეთის დროშის ქვეშ მცურავი გემი გუშინ, 19 ნოემბერს, ქალაქ ერეგლისთან ჩაიძირა, სტამბოლიდან დაახლოებით 200 კილომეტრში.
ცნობილია, რომ გემზე 12 ადამიანი იმყოფებოდა – ეკიპაჟის წევრები, მათთან კონტაქტი ჯერ ვერ ხერხდება.
თურქეთის შს მინისტრმა ალი იერქილაიმ განაცხადა, რომ ეკიპაჟის გადარჩენის ოპერაციის დაწყებას ძლიერი შტორმი აფერხებს. მისი თქმით, სამაშველო ჯგუფები ახლა ამინდის შეცვლას ელოდებიან.
„სამწუხაროდ, ვერ ჩავატარეთ 12 თურქი ეკიპაჟის წევრის სამაშველო ოპერაცია. როგორც კი პირობები გაუმჯობესდება, ოპერაცია უმალ დაიწყება“, – ციტირებს მას Associated Press-ი.
მედიის ცნობით, 19 ნოემბერს თურქეთის ჩრდილო-დასავლეთ ნაწილს შტორმი დაატყდა, რომლის შედეგადაც კიდევ ერთმა გემმა განიცადა კატასტროფა – მისი ეკიპაჟის ყველა წევრი გადაარჩინეს. გარდა ამისა, სანაპიროსთან ახლოს მდებარე ციხეში ევაკუაცია გამოაცხადეს, წყლის დონის მკვეთრი ზრდის რისკის გამო.
______
ფოტო: gazeteoksijen.com
