„გშია? აიღე საჭმელი“ – ბათუმში, თამარის დასახლების ერთ-ერთ ქუჩაზე ეს განცხადება, საკვებით სავსე პარკთან ერთად, ხეზე გამოკიდეს. მერვეკლასელი ანა ჩანტლაძე ამბობს, რომ არ იცის, პირველად ვინ გამოაკრა ეს განცხადება მისი საცხოვრებელი კორპუსის წინ, ლესელიძის ქუჩაზე, თუმცა იდეა ძალიან მოეწონა და თავადაც ტოვებს საკვებს ხესთან.
ამ სიახლის ამსახველი ფოტო „ბათუმელებს“ ანა ჩანტლაძემ გამოუგზავნა.
„მორიგეობით ყველა ვტოვებთ საკვებს. მე თავდაპირველად რულეტი დავტოვე… ბევრს შეიძლება მოშივდეს, გამვლელიც ბევრია ჩვენს ქუჩაზე. ყველამ უნდა გაიგოს, რომ სხვებზე ზრუნვაა საჭირო. მხოლოდ შენ იყო კარგად, ასე არ გამოვა.
მერე განცხადება წვიმამ დაასველა და ჩამოვარდა. დღეს მე ამოვბეჭდე იგივე ტექსტი და ხელახლა გავაკარი. გამიხარდება, თუ ბევრი დატოვებს საკვებს და სხვებიც მოაწყობენ მსგავს კუთხეს,“ – აღნიშნა ანა ჩანტლაძემ „ბათუმელებთან“.
