ჩეჩნეთის ლიდერმა, რამზან კადიროვმა შვილი, 18 წლის ახმატ კადიროვი ჩეჩნეთის სპორტის მინისტრის პირველ მოადგილედ დანიშნა – ამის შესახებ ჩეჩნეთის პარლამენტის თავმჯდომარემ, მოჰამედ დაუდოვმა განაცხადა ტელეგრამზე.
„დარწმუნებული ვარ, რომ მისი ამ საპასუხისმგებლო პოსტზე დანიშვნა ხელს შეუწყობს სამინისტროს საქმიანობის დონისა და ხარისხის ამაღლებას სპორტის განვითარებაში, ახალგაზრდული პოლიტიკის განხორციელებაში, ახალგაზრდა თაობის პატრიოტულ, სულიერ და მორალურ აღზრდაში“ – წერს დაუდოვი.
ახმატ კადიროვის სპორტის მინისტრის მოადგილედ დანიშვნას წინ უძღოდა რამზან კადიროვის კიდევ ერთი, 15 წლის შვილის დანიშვნა საპასუხისმგებლო თანამდებობაზე.
მედიის ცნობით, 9 ნოემბერს რამზან კადიროვის სამმა ვაჟმა – ახმატმა, ელიმ და ადამმა მიიღეს რუსეთის პარლამენტის უმაღლესი ორდენი.
სხვადასხვა მედიის ინფორმაციით, კადიროვს 10-ზე მეტი შვილი ჰყავს. მისი უფროსი შვილი, 24 წლის აიშატ კადიროვა, ჩეჩნეთის კულტურის მინისტრია. ერთი თვის წინ რამზან კადიროვმა განაცხადა, რომ აიშატი ჩეჩნეთის ვიცე-პრემიერი გახდება.
_________________
ფოტოზე: ახმატ კადიროვი რუსეთის პრეზიდენტთან, პუტინთან შეხვედრისას.
