ხულოს მუნიციპალიტეტში, სხალთა-ხიხაძირის გზაზე, სოფელ წაბლანასთან, გზის სავალი ნაწილი ჩანგრეულია.
მიზეზი, როგორც ერთ-ერთი ადგილობრივი ამბობს, მეწყერია, თუმცა, გზა თითქმის ერთი წელია დაზიანებულია და აქ გავლა სახიფათოა:
„გარდა იმისა, რომ გზა ჩანგრეულია, ასფალტის საფარი ბევრ ადგილზე დაბზარულია და წვიმის შემთხვევაში არ არის გამორიცხული გზის სხვა ნაწილიც ჩაინგრეს. ეს კი ხიხაძირისკენ მიმავალი გზის ჩაკეტვას გამოიწვევს. ზამთარი მოახლოებულია და აქ გავლა უფრო საშიში იქნება“.
„ბათუმელები“ აჭარის საავტომობილო გზების დეპარტამენტს დაუკავშირდა.
„მიმდინრეობს პროექტირება. მისი დასრულებისთანავე, უახლოეს პერიოდში დაიწყება გზის დაზიანებული მონაკვეთის აღდგენითი სამუშაოები“, – მოგწერეს აჭარის გზების დეპარტამენტიდან.
სხალთა-ხიხაძირის გზის დაზიანებული მონაკვეთი სოფელ წაბლანასთან / 17.10.2023
აღნიშნული გზის გაგრძელება – სოფელ ფუშრუკაულიდან ხიხაძირამდე მონაკვეთში, რომლის რეაბილიტაცია 2021 წელს უნდა დასრულებულიყო, ისევ სავალალო მდგომარეობაშია. გზის ამ მონაკვეთზე კი, პასუხისმგებელი არა აჭარის, არამედ საქართველოს საავტომობილო გზების დეპარტამენტია.
საქართველოს საავტომობილო გზების დეპარტამენტმა ტენდერი გზის აღნიშნული მონაკვეთის „დარჩენილი სარეაბილიტაციო სამუშაოების დასრულებაზე“ 7 500 823 ლარით გამოაცხადა თუმცა, ეს ტენდერი არ შედგა.
დეპარტამენტმა ხელახალი ტენდერი გამოაცხადა, სადაც წინადადებების მიღება 2023 წლის 28 ოქტომბერს დაიწყება და 2 ნოემბერს დასრულდება. სატენდერო თანხა უცვლელია – 7 500 823 ლარი.
არშემდგარი ტენდერის დეტალები ნახეთ ამ ბმულზე:
ბიუჯეტიდან გადარიცხული 188 000 ლარიდან ხიხაძირი-ბაკოს გზაზე 145 000 ლარი გაქრა
