ბათუმის კვების სამ ობიექტში კონკურენციის სააგენტომ დარღვევა დაადგინა. სააგენტოს ინფორმაციით, კვების ობიექტები მომხმარებელს სერვისს ქართულ ენაზე არ აწვდიდნენ.
კონკურენციის სააგენტოს ცნობით, ისინი „მომხმარებლის უფლებების დაცვის შესახებ“ საქართველოს კანონის შესაძლო დარღვევის ფაქტს 5 მოვაჭრის მიმართ სწავლობდნენ.
„სააგენტოს გადაწყვეტილებით, 3 მოვაჭრის – შპს „ქიზილ 2023“-ის, შპს „გრილ ფუდის“ და შპს „ჰარვიდენტის“ მხრიდან დარღვევის ფაქტი დადასტურდა. საკითხი ეხებოდა კვებით ობიექტებში, საცნობარო (კვების) მენიუს და მომსახურების არასახელმწიფო ენაზე მიწოდებას. ხოლო, სააგენტოს გადაწყვეტილებით, შპს „დანოს“ და შპს „მაქსი სედვიჩ ჩიქენის“ მხრიდან ზემოხსენებული დარღვევის ფაქტი არ დადასტურდა,“ – ნათქვამია კონკურენციის სააგენტოს მიერ გავრცელებულ რელიზში.
სააგენტოს ინფორმაციითვე, პირველ ეტაპზე რადგან კანონდარღვევა დადასტურდა, ობიექტის მესაკუთრეები გააფრთხილეს, რომ მდგომარეობა გამოასწორონ განსაზღვრულ ვადაში. თუ არ გამოასწორებენ შემდეგ კანონი ითვალისწინებს ჯარიმას – წინა წლის ფინანსური ბრუნვის 2 პროცენტის ოდენობით. თუ წინა წელს არ აქვს ბრუნვა, ობიექტი დაახლოებით 600 ლარით დაჯარიმდება.
მოქმედი კანონმდებლობით, ყველა მომხმარებელს აქვს უფლება, მოითხოვოს და მიიღოს ინფორმაცია სახელმწიფო ენაზე, ხოლო მისი არცოდნა არ შეიძლება მომსახურების გაწევაზე უარის თქმის მოტივი იყოს.
კონკურენციის სააგენტოს ცნობით, საკითხის შესწავლის დროს „რელევანტური გარემოებების დადგენა-დაზუსტების მიზნით“ სააგენტომ ობიექტებს ინფორმაციის მიწოდება მოსთხოვა. ხოლო მას შემდეგ, რაც ეს ინფორმაცია არ მიაწოდეს, ეს ობიექტები ინფორმაციის მიუწოდებლობისთვის დააჯარიმა.
„სააგენტოს მიერ მოთხოვნილი ინფორმაციის დადგენილ ვადაში მიუწოდებლობისთვის შპს „გრილ ფუდს“ და შპს „ჰარვიდენტს“ ჯარიმა დაეკისრათ, თითოეულს 500 ლარის ოდენობით. დღეის მდგომარეობით, შპს „გრილ ფუდის“ მიერ ხსენებული ჯარიმა გადახდილია,“ – ვკითხულობთ სააგენტოს განცხადებაში.
კონკურენციის ეროვნული სააგენტოს ცნობით, მათ კვების ობიექტების საქმეების შესწავლა ბათუმის მუნიციპალური ინსპექციის წერილის საფუძველზე დაიწყეს.
საქმე ეხება ბათუმში 11 მოვაჭრის მიერ საზოგადოებრივი კვების ობიექტებში, კაფე-ბარებში, მხოლოდ უცხო ენაზე მომსახურებას. ამ ეტაპზე 6 მოვაჭრის მიმართ საქმის შესწავლა გრძელდება.
ამავე თემაზე:
რა ხდება ბარებში, რომლებიც მობილიზაციას გამოქცეულმა რუსებმა გახსნეს ბათუმში – VIDEO
