ქონების ეროვნული სააგენტო ბათუმში, ზღვასთან ახლოს, 1 488 კვ. მეტრ მიწის ნაკვეთს ყიდის. ელექტრონული აუქციონი დაწყებულია და 23 ოქტომბერს უნდა დასრულდეს. ქონების ფასი 365 000 ლარია, ბიჯი – 2 000 ლარი.
აუქციონის პირობების მიხედვით, გასაყიდი მიწის ნაკვეთიდან 70 კვ.მ და 335 კვ.მ. მიწის ნაკვეთებზე გავრცელდება სერვიტუტის უფლება [უძრავი ქონების გამოყენება იმგვარად, რომ პირს უფლება მიეცეს ისარგებლოს ამ ნაკვეთით, ან აკრძალოს ამ ნაკვეთზე მესაკუთრის მიერ ზოგიერთი მოქმედების განხორციელება]. მეორე მხარეს მომიჯნავე ნაკვეთი კი კერძო საკუთრებაა.
გასაყიდ მიწის ნაკვეთს ერთ მხარეს სახელმწიფოს საკუთრებაში არსებული ნაკვეთი ესაზღვრება, სადაც ძველი შენობებიც არის.
ქონების ეროვნული სააგენტოს მონაცემებით [და რეესტრის ამონაწერით], გასაყიდი მიწის ნაკვეთი მდებარეობს ბათუმში, დაბა ჩაქვში, ჭავჭავაძის ქუჩა N7-ში [თუმცა, აღსანიშნავია, რომ გასაყიდი ნაკვეთი დღეს მეზღვაურის ქუჩაზე მდებარეობს და ის ქალაქ ბათუმის ადმინისტრაციულ საზღვრებშია.]
გასაყიდი მიწის ნაკვეთი მონიშნულია ყვითელი ხაზით
სააგენტოს ინფორმაციით გასაყიდი ნაკვეთი მდებარეობს მდინარის [მდინარე ჩაქვისწყალი] სიახლოვეს, ასევე გამანაწილებელ არხთან და ხელოვნურ ტბორთან.
გამყიდველი ორგანიზაცია ასევე მიუთითებს, რომ ასეთ შემთხვევაში მყიდველის მიერ გასათვალისწინებელია „წყლის შესახებ“ საქართველოს კანონი და „წყალდაცვითი ზოლის შესახებ ტექნიკური რეგლამენტის დამტკიცების თაობაზე“ საქართველოს მთავრობის 2013 წლის 31 დეკემბრის №440 დადგენილებით განსაზღვრული მოთხოვნები და აკრძალვები.
ამ მოთხოვნებსა და აკრძალვებს ხშირად მუნიციპალიტეტების მერიები არ ითვალისწინებენ, როცა მშენებლობების ნებართვებს გასცემენ. „ბათუმელებმა“ ცოტა ხნის წინ გამოაქვეყნა მასალა მსგავსი მითითებით გაყიდულ მიწის ნაკვეთზე, სადაც შემსყიდველმა კოტეჯები ააშენა.
მყიდველი ვალდებულია საპრივატიზებო თანხა გადაიხადოს ელექტრონული აუქციონის დასრულებიდან 30 კალენდარული დღის ვადაში.
ამავე თემაზე:
კოტეჯები მდინარე ყოროლისწყლის კალაპოტში – ამ ადგილს პერიოდულად წყალი ფარავს
