ნატოს ქვეყნები აპირებენ გაზარდონ საბრძოლო მასალის წარმოება უკრაინისთვის და ჩრდილოატლანტიკური ალიანსის იმ ქვეყნებისთვის, რომლებმაც იარაღის მნიშვნელოვანი ნაწილი გაგზავნეს უკრაინაში – ამის შესახებ „ამერიკის ხმა“ წერს ნატოში აშშ-ის ელჩზე, ჯულიან სმიტზე დაყრდნობით.
ამ თემაზე ჯულიან სმიტმა ვირტუალურ ფორუმზე – Win the War – ისაუბრა 27 სექტემბერს.
გამოცემის ცნობით, სმიტმა თქვა, რომ გახანგრძლივებულმა საომარმა მოქმედებებმა აჩვენა, რომ იარაღისა და საბრძოლო მასალის მარაგი არასაკმარისია, ამიტომაც ნატომ დაიწყო მუშაობა თავდაცვის წარმოების სამოქმედო გეგმაზე, რომელიც ფოკუსირებულია საბრძოლო მასალის დეფიციტის აღმოფხვრაზე, როგორც უკრაინელებისთვის, ასევე ნატოს ზოგიერთი წევრისთვის, რომლებიც დახმარებას უწევდნენ უკრაინას.
„კითხვა, რომელიც ნატოს მოლაპარაკებების მაგიდასთან გვესმის, არის – კიდევ რა შეგვიძლია გავაკეთოთ ჩვენი მეგობრებისთვის უკრაინაში. ჩვენ ვიზიარებთ უკრაინის მხარდაჭერის ვალდებულებას. ჩვენ გვესმის, რა არის სასწორზე. უკრაინა მხოლოდ თავის ტერიტორიას არ იცავს. უკრაინა იცავს ღირებულებებს, რომლებსაც ჩვენ ყველა ვიცავთ აქ“, – ციტირებს „ამერიკის ხმა“ ჯულიან სმიტს.
___________________
ფოტოზე: ჯულიან სმიტი. ფოტო: EPA-EFE/STEPHANIE LECOCQ
