რუსული სამთავრობო საინფორმაციო სააგენტო „ტასის“ თანახმად, რუსეთს, საქართველოსა და თურქეთს შორის საბორნე მიმოსვლა დაიწყება.
განცხადება საბორნე მიმოსვლის დაწყების შესახებ რუსეთის ფედერაციის სავაჭრო-სამრეწველო პალატის ვიცე-პრეზიდენტმა, ვლადიმერ პადალკომ გააკეთა, რომლის თქმით, ბორანს 300 მგზავრი ეყოლება.
„ტასის“ თანახმად, განცხადება პადალკომ ამის შესახებ რუსეთის სავაჭრო-სამრეწველო პალატაში გამართული რუსულ-ქართული ბიზნეს საბჭოს სხდომის შემდეგ გააკეთა ჟურნალისტებთან.
„ვისაუბრეთ საზღვაო მიმართულებით საბორნე მომსახურების თურქეთი-საქართველო-რუსეთის მონაკვეთზე. ახლა 150 მანქანაზე და 300 მგზავრზე გათვლილი ბორანი ამოქმედდება, რომელიც თითქმის მთელი წლის განმავლობაში იმუშავებს,“ – თქვა ჟურნალისტებთან ვლადიმერ პადალკომ.
პადალკოს თქმით, შეხვედრაზე ასევე განიხილეს საქართველოსა და რუსეთს შორის სარკინიგზო კომუნიკაციის საკითხი.
„ბათუმელებმა“ სცადა დაკავშირება საზღვაო ტრანსპორტის სააგენტოსთან, თუმცა სააგენტოში ჩვენს ზარებს არ უპასუხეს.
კომენტარისთვის მივმართეთ საქართველოს ეკონომიკის სამინისტროსაც. სამინისტროს პასუხის შემთხვევაში მასალა განახლდება.
მიმდინარე წლის ზაფხულში, ივლისსა და აგვისტოში საპროტესტო აქციები მოჰყვა ბათუმში რუსეთიდან გამოსული საკრუიზო ლაინერის შემოსვლას. ორდღიანი მასშტაბური აქციის შემდეგ, საკრუიზო კომპანიამ ბათუმი ტურისტული მარშრუტიდან ამოიღო.
____________________
მთავარი ფოტო: მოქალაქეები აპროტესტებენ ბათუმში საკრუიზო ლაინერის შემოსვლას 27 ივლისი, 2023
