უკრაინა მალე მიიღებს აშშ-დან „აბრამსის“ ტანკებს

აშშ-ის თავდაცვის მდივანმა, ლოიდ ოსტინმა განაცხადა, რომ უკრაინა შეერთებული შტატებისგან მალე მიიღებს „აბრამსის“ ტანკებს.

„ჩვენი ბოლო შეხვედრის შემდეგ შეერთებულმა შტატებმა უზრუნველყო უსაფრთხოების დამატებითი დახმარების პაკეტები, რომელთა საერთო რაოდენობა 2 მილიარდ დოლარს აღემატება. ეს პაკეტები მოიცავს სასწრაფოდ საჭირო საჰაერო თავდაცვას, საბრძოლო მასალებს და ნაღმების გაწმენდის აღჭურვილობას.

და მოხარული ვარ განვაცხადო, რომ „აბრამსის“ ტანკები მალე ჩამოვა უკრაინაში“, – განაცხადა ოსტინმა.

ჯო ბაიდენის ადმინისტრაციამ წლის დასაწყისში განაცხადა, რომ აპირებს „აბრამსის“ ტანკების უკრაინაში გაგზავნას. „აბრამსების“ რაოდენობა დაზუსტებული არ არის.

„აბრამსები“ არაა ერთადერთი დასავლური ტანკი, რომელიც უკრაინას გადაეცემა. კიევი უკვე აქტიურად იყენებს „ლეოპარდებს“ – გერმანული წარმოების ტანკებს.

„აბრამსების“ მართვისთვის უკრაინელი სამხედროების წვრთნა გერმანიაში მაისში დაიწყო. „პოლიტიკოს“ ცნობით, ორასმა უკრაინელმა სამხედრომ წვრთნები უკვე დაასრულა.

_______________

ფოტო: ვიკიპედია