საქართველოში 100 ათასზე მეტი ლარი ხელფასი 2023 წლის ივლისის თვეში 214 პირს დაერიცხა. დასაბეგრმა ხელფასმა კი, ჯამურად, 83,7 მილიონი ლარი შეადგინა.
შემოსავლების სამსახურის მონაცემების მიხედვით, ეს მაჩვენებელი 2022 წლის ივლისთან შედარებით 18-ით არის გაზრდილი. გასული წლის ივლისში 100 ათასზე მეტი ლარი ხელფასი 196 პირს დაერიცხა [ ჯამურად 75,4 მილიონი ლარი].
რაც შეეხება მთლიან შემოსავლებს [ხელფასი, მოგება და სხვა], 2023 წლის ივლისში 100 ათასზე მეტი ლარი შემოსავალი 827-მა პირმა მიიღო. გასული წლის ივლისში კი, ამ ოდენობის შემოსავლების მიმღები პირების რაოდენობა ოცით მეტი – 847 იყო.
შემოსავლების სამსახურის სტატისტიკის მიხედვით, დიფერენცირებულად, ხელფასის მიმღებთა ყველაზე მეტ რაოდენობას 2023 წლის ივლისში ის ფიზიკური პირები შეადგენენ, რომლებსაც აღნიშნულ თვეში ხელფასის სახით 1 200-დან 2 400-მდე ლარი ჩაერიცხათ. ამ ოდენობის ხელფასის მიმღებ ფიზიკურ პირთა რაოდენობამ მიმდინარე წლის ივლისში 304 201 შეადგინა.
2022 წლის ივლისში კი, 1 200-დან 2 400 ლარამდე ხელფასი 266 595 პირს დაერიცხა [37 606 ადამიანით ნაკლებს, ვიდრე მიმდინარე წლის ივლისში].
საქართველოში, 2023 წლის ივლისის მონაცემებით, 122 981 ადამიანის ხელფასი იყო 500-ზე ნაკლები ლარი [გასული წლის ივლისში კი, 500-მდე ლარი ხელფასი 144 681-მა ადამიანმა აიღო];
500-დან 1 000-მდე ლარი ხელფასი კი, მიმდინარე წლის ივლისში 187 071 პირს დაერიცხა [ანალოგიური ოდენობით ხელფასი გასული წლის ივლისში 222 235-მა პირმა აიღო].
2023 წლის ივლისში 12 ათასიდან 100 ათასამდე ლარის ოდენობით ხელფასი საქართველოში 9 716 პირს დაერიცხა.
წყარო: შემოსავლების სამსახური
