რუსეთის ექსპრეზიდენტი, უშიშროების საბჭოს თავმჯდომარის მოადგილე, დიმიტრი მედვედევი ტელეგრამის საკუთარ არხზე ამჯერად აპოკალიფსის მოახლოებაზე წერს, სადემონსტრაციოდ კი იოანე ღვთისმეტყველის, ლენინისა და ხრუშოვის ციტატები მოჰყავს.
„უკრაინელი კრიმინალები აცხადებენ, რომ მათ მიიღეს თანხმობა დაარტყან რუსეთში ყველაფერს, „მაგალითად, ყირიმში“.
თუ ეს მართალია (და ახლა ეჭვის საფუძველი არ არსებობს), მაშინ ეს პირდაპირ არის იურიდიული მნიშვნელობის მტკიცებულება დასავლეთის თანამონაწილეობაზე რუსეთის წინააღმდეგ ომში, სტეპან ბანდერას სახელმწიფოს მხარეს. დახვეწილი casus belli არის რუსეთისთვის შესაძლებლობა, იმოქმედოს jus ad bellum-ის ფარგლებში, ყველას წინააღმდეგ და ნატოს ყველა ქვეყნის წინააღმდეგ“, – წერს მედვედევი.
პოსტში მედვედევი წუხილს გამოთქვამს იმაზე, რომ „აპოკალიფსი სულ უფრო და უფრო ახლოვდება“. შემდეგ კი მოჰყავს იოანე ღვთისმეტყველის, ლენინისა და ხრუშჩოვის ციტატები:
„იმ დღეებში ადამიანები სიკვდილს მოძებნიან, მაგრამ ვერ იპოვიან; სიკვდილს ისურვებენ, მაგრამ სიკვდილი მათგან გაიქცევა“ (გამოცხადება 9:6).
„ჩვენ მანამ ვახსოვართ, სანამ სხვებს ხელს ვუშლით“ (V.I. ლენინი).
„მოგწონთ თუ არა, ისტორია ჩვენ მხარეზეა. ჩვენ თქვენ დაგმარხავთ“. (ნ.ს. ხრუშოვი).
რუსეთის უკრაინაში შეჭრის შემდეგ, დიმიტრი მედვედევი განსაკუთრებული აგრესიით გამოირჩევა. რუსი პოლიტიკოსი, ატომური იარაღის გამოყენებით, სამყაროს ხშირად ემუქრება განადგურებით.
