მთავარი,სიახლეები

რას ჰყვება ბათუმელი მეზღვაური ატლანტის ოკეანეში 10 მიგრანტის გადარჩენაზე 

28.08.2023 • 8762
რას ჰყვება ბათუმელი მეზღვაური ატლანტის ოკეანეში 10 მიგრანტის გადარჩენაზე 

ქართველმა მეზღვაურებმა ატლანტის ოკეანეში ათი მიგრანტის სიცოცხლე გადაარჩინეს. შემთხვევა 24 აგვისტოს მოხდა, კადიზის ყურეში, დასავლეთ გიბრალტარიდან 100 მილის მოშორებით.

„[კაპიტნის] უფროსმა თანაშემწემ, თენგო დიასამიძემ შეამჩნია ღია ოკეანეში. „ვახტაზე“ იდგა და დაინახა პატარა ნავი. დურბინდით რომ გაიხედა, ნავზე მყოფები შველას ითხოვდნენ. მაშინვე შეატყობინა კაპიტანს, ალეკო სურმანიძეს. კაპიტანმა მიიღო გადაწყვეტილება, რომ დავხმარებოდით,“ – მოუყვა „ბათუმელებს“ მეზღვაური გიორგი გოგიტიძე.

რეზინის გასაბერ ნავზე მაროკოს ათი მოქალაქე იმყოფებოდა. ისინი მაროკოს ქალაქ მუჰამედიდან 2023 წლის 15 აგვისტოს გამოვიდნენ და ცდილობდნენ ესპანეთის სანაპირომდე მიღწევას. თუმცა მათი ნავი დინებამ გაიტაცა და ღია ზღვაში აღმოჩნდნენ, საჭმლის, სასმელი წყლისა და ყველაფრის გარეშე.

მიგრანტების ნავი ატლანტის ოკეანეში ფოტო: გიორგი გოგიტიძე

მეზღვაურებმა ოკეანეში სამაშველო კიბე ჩაუშვეს და ისე ამოიყვანეს მიგრანტები. ერთ-ერთი მიგრანტი ზღვაში გადახტა.

„როდესაც ამოვიყვანეთ ოკეანიდან, მერე გვითხრა – იმიტომ გადმოვხტი ნავიდან, შემეშინდა ამ გემსაც არ გაესწროო. ძალიან გაუგებრად ლაპარაკობდა, სტრესში იყო. რაც გავიგეთ, ის გვითხრა, რომ 9 დღე საჭმელ-სასმელის გარეშე გავატარეთ ნავზე. ბევრ გემს ვთხოვეთ დახმარება, მაგრამ ვერ გვამჩნევდნენო,“ – გვიყვება გიორგი გოგიტიძე.

ქართველი მეზღვაურები გადარჩენილ მიგრანტთან ერთად

გიორგის თქმით, ნავზე მყოფი ყველა პირი კაცი იყო, 2006-2007 წლებში დაბადებული ახალგაზრდები.

„ჩავაცვით, პირველადი დახმარება გავუწიეთ, ტანსაცმელი მივეცით, მზისგან დამწვარი იყვნენ და წამალი წავუსვით. გვითხრეს – თქვენ რომ არა, ამ საღამოს ვეღარ გადავიტანდით, უფრო და უფრო ღრმად მიგვათრევდა დინებაო,“ – გვიყვება გიორგი გოგიტიძე.

გოგიტას თქმით, მას შემდეგ, რაც მიგრანტები გემზე აიყვანეს და გადაარჩინეს, ისინი ესპანეთის სასაზღვრო პოლიციამ წაიყვანა.

გემი, რომელმაც მიგრანტები აიყვანა, ლიბერიის დროშის ქვეშ ცურავდა. გემის ეკიპაჟი ქართულ-თურქულია.

ეკიპაჟის შემადგენლობაში შედიოდნენ: კაპიტანი ალექსანდრე სურმანიძე, თენგო დიასამიძე, გერასიმ სურმანიძე, საბა ბერიძე, უჩა ჭინკაძე, ირაკლი ასამბაძე, ირაკლი კონცელიძე, გიორგი ომერაძე, გიორგი გოგიტიძე, აჩი ჭინკაძე, აჩი ზაქარაძე, მამუკა ტოღონიძე, მირზა სურმანიძე, ლაშა მენაღარიშვილი, ალპერ დემირდირი, ადემ სეითოღლუ, ემინ უურ იურთი, ენვერ აიასი, ერქან არასი, ერჰან ქამათი, სერდარ ილმაზი და მეჰმედ ალი ოზილდიზი.

მიგრანტების გადარჩენა ატლანტის ოკეანეში ფოტო: გიორგი გოგიტიძე

გადაბეჭდვის წესი


ასევე: