ბათუმის ძველ ბულვარში, საზაფხულო თეატრის მიმდებარედ არსებული ფილების შესაცვლელად ბულვარის ადმინისტრაციამ ტენდერი გამოაცხადა. სატენდერო თანხა 1 652 772 ლარია.
პირობის მიხედვით, აქ არსებულ გრანიტის ფილებს ახალი მოზაიკური ფილებით ჩაანაცვლებენ. ფილების სამი დიზაინი ბულვარის ადმინისტრაციამ რამდენიმე თვის წინ გამოაქვეყნა და მოქალაქეებს მათთვის სასურველი ვარიანტისთვის ხმის მიცემა სთხოვა.
2023 წლის 11 მაისს, ბულვარის ადმინისტრაციამ გაავრცელე ინფორმაცია, რომ „ბათუმის ბულვარში საზაფხულო თეატრის მიმდებარედ მოზაიკის მოსაწყობად ჩატარებულ ფეისბუქ-გამოკითხვაში 1827 მონაწილე ჩაერთო. გამოკითხვის შედეგად, ხმების 56,9 პროცენტი მიიღო დიზაინის მე-2 ვარიანტმა.“
გამარჯვებული ვერსიის ფოტო:
ფოტო ბულვარის ფეისბუქგვერდიდან
ტენდერში წინადადებების მიღება 2023 წლის 2 სექტემბერს დაიწყება და 7 სექტემბერს დასრულდება.
პირობის მიხედვით, „სამუშაოები უნდა განხორციელდეს ეტაპობრივად, კალენდარული გეგმა-გრაფიკის შესაბამისად არაუადრეს 2023 წლის 15 ოქტომბრიდან 150 დღის ვადაში [2023-2024 წლები].“
სამუშაოების დაფინანსების წყაროა აჭარის 2023-2024 წლების ბიუჯეტი. ამასთან, შესრულებული სამუშაოები, წლების მიხედვით, დაფინანსდება შემდეგი ოდენობით:
- 2023 წელს – 430 000 ლარი
- 2024 წელს – 1 162 772 ლარი
საპროექტო ტერიტორია / ფოტო ტენდერიდან
ბულვარის ადმინისტრაცია ძველ ქვაფენილს ასეთი მოზაიკური ფილებით ჩაანაცვლებს
განახლება: აღნიშნული ტენდერი არ შედგა – მასში მონაწილეობა არავინ მიიღო. ბულვარის ადმინისტრაციამ ხელახალი ტენდერი იგივე თანხით და იგივე პირობებით გამოაცხადა. ხელახალ ტენდერში წინადადებების მიღება 2023 წლის 28 სექტემბერს დაიწყება და 3 ოქტომბერს დასრულდება.
ბულვარს მოზაიკური ფილების სამი დიზაინი ჰქონდა წარმოდგენილი.
ვრცლად ამ თემაზე:
https://batumelebi.netgazeti.ge/news/476224/
