აქტივისტები და ახალგაზრდები, რომლებიც ხულოში ცხოვრობენ, უკვე მეორე დღეა ითხოვენ ხულოში „გამართული და ხარისხიანი სამედიცინო სერვისების აღდგენას“. აქცია გაგრძელდება ხვალაც. პროტესტს იწვევს ხულოს დაბაში მოქმედ კლინიკაში არსებული მდგომარეობა და ასევე გინეკოლოგიური განყოფილების გაუქმება.
აქციის ორგანიზატორია არასამთავრობო ორგანიზაცია „სოლიდარობის თემი“.
გასული თვის ბოლოს, სწორედ გინეკოლოგიური განყოფილების გაუქმების შემდეგ, მძიმე მდგომარეობაში მყოფი ახალგაზრდა ქალი ხულოდან გადაიყვანეს ბათუმში, კლინიკა „მედინაში“. როგორც კლინიკის ექიმმა, ინდირა ბოლქვაძემ „ბათუმელებთან“ აღნიშნა, კლინიკაში შეყვანისას ქალისა და ბავშვის სიცოცხლე საფრთხის ქვეშ იყო. ექიმების თქმით, მსგავსი მძიმე ვითარება არც თუ იშვიათად იქმნება.
დღევანდელი აქცია დაიწყო ხულოს მერიის წინ, შემდეგ კი აქციის მონაწილეებმა კლინიკა „ევექსთან“ გადაინაცვლეს.
აქციის ერთ-ერთი ორგანიზატორი, აქტივისტი ლია დეკანაძე აცხადებს, რომ ისინი არ აპირებენ „ევექსის“ ანუ კერძო კომპანიის საქმიანობაში ჩარევას და დღევანდელი აქციის პროტესტი მთლიანად მიემართება სახელმწიფოს. „დაასუბსიდიროს ეს საქმიანობა ან თავის ბალანსზე აიყვანოს“, – აცხადებს ახალგაზრდა ქალი.
აქციის მონაწილეების ინფორმაციით, „ევექსის“ კლინიკამ სამშობიარო განყოფილება იმ მოტივით დახურა, რომ ის არ იყო მომგებიანი. სწორედ ამ მოტივით გინეკოლოგიური განყოფილების თანამშრომლების ხელფასი საათში 1.2 ლარი იყო, ხელფასის მომატების მოთხოვნის შემდეგ კი დამსაქმებელმა მათ უთხრა – „შეგიძლიათ წახვიდეთ“.
„ხულოში მცხოვრები არც ერთი ქალი არ იმსახურებს, რომ მშობიარობდეს ბათუმი-ახალციხის გზაზე. ეს არის ღირსების შემლახავი. ეს არის სიცოცხლის უფლების რისკის ქვეშ დაყენება. ეს არის ახალი თაობის გაწირვა და მათი უფლების ხელყოფა“, – აცხადებდნენ აქციაზე.
საპროტესტო აქცია ხულოში ხვალაც გაიმართება.
„ბათუმელებმა“ ამ საკითხზე მიმართა საქართველოს მთავრობას. უწყების გამოხმაურების შემთხვევაში ინფორმაცია აქვე განახლდება.
შესაბამისად, ამ ეტაპზე უცნობია, დაასუბსიდირებს თუ არა საქართველოს მთავრობა ხულოში გინეკოლოგიურ განყოფილებას. თუმცა დასუბსიდირების პრაქტიკას სახელმწიფო აქტიურად იყენებს – მაგალითად, კახეთში ყურძნის სუბსიდირებაზე 2008 – 2021 წლებში 286.6 მილიონი ლარი დახარჯა. სახელმწიფო სუბსიდიას გასცემს ასევე მანდარინზეც.
