დღეს, პირველ აგვისტოს, ბათუმში რუსეთიდან შემოსული გემის წინააღმდეგ გამართულ საპროტესტო აქციაზე დაკავებული პირების სასამართლო პროცესები იმართება. ყველა მათგანის საქმეს ბათუმის საქალაქო სასამართლოს მოსამართლე ალექსანდრე გოგუაძე უძღვებოდა.
დღეს, 17:00 საათზე 8 დაკავებულის სასამართლო პროცესი გაიმართა. სულ 23 პირია დაკავებული.
პროცესების უმრავლესობა 7 აგვისტოსთვის გადაიდო.
31 ივლისს აქციაზე დაკავებული 20 წლის ილია ანთაძის სასამართლო პროცესი, ადვოკატის მოთხოვნით, 8 აგვისტოს გადაიდო. ადვოკატის თქმით, მათთვის ჯერჯერობით არ გადაუციათ დაკავების ოქმები და საქმის მასალები, ასევე საჭიროა დრო მტკიცებულებების შესაგროვებლად.
მედიასთან საუბარში ილია ანთაძემ აღნიშნა, რომ მისთვის უცნობია დაკავების მოტივი. დაკავებისას კი პოლიციელებმა ფიზიკური დაზიანებები მიაყენეს.
იმავე მიზეზით გადაიდო ლადო ჩიბურდანიძის სასამართლო პროცესიც 7 აგვისტოსთვის.
მოსამართლემ 7 აგვისტოს გადადო გიორგი სანაძის სასამართლო პროცესიც. ამ შემთხვევაშიც ადვოკატი აცხადებდა, რომ მოპასუხე მხარე არ იცნობს საქმის მასალებს და არც დაკავების ოქმი წარუდგენიათ.
გუშინ, 31 ივლისს, საპროტესტო აქციაზე პოლიციამ უკრაინის მოქალაქე დმიტრო ზაკრევსკიც დააკავა. მისი სასამართლო პროცესიც დღეს გაიმართა, თუმცა საქმის განხილვა ასევე 7 აგვისტოსთვის გადაიდო ადვოკატის მოთხოვნით.
როგორც წინა საქმეებშიც, აქაც ადვოკატი ამბობდა, რომ საჭიროა მტკიცებულებების შეგროვება და საქმის მასალების გაცნობა.
ადვოკატმა ასევე მოითხოვა, რომ სასამართლო პროცესები დასრულდეს 25 აგვისტომდე, რადგან ამ დროისთვის დმიტრო ზაკრევსკიმ ქვეყანა უნდა დატოვოს.
დღეს გაიმართა კიდევ ორი დაკავებულის – მირიან ჯიბლაძისა და რამაზ გორგაძის სასამართლოც, თუმცა ეს პროცესით იმავე მიზეზით გადაიდო 7 აგვისტოსთვის.
ერთადერთი, ვინც დღეს სასამართლოზე ადვოკატის გარეშე გამოცხადდა, გიგა შალიკაძე იყო. მას პოლიციის მიმართ დაუმორჩილებლობას და ხულიგნობას ედავება მოსარჩელე მხარე.
პოლიციელი, რომელმაც შალიკაძის დაკავების ოქმი გამოსცა, ამბობდა, რომ შალიკაძე არ დაემორჩილა მის მოთხოვნას, გადასულიყო გზიდან და იგინებოდა პოლიციელების მისამართით.
გიგა შალიკაძემ სასამართლოზე განაცხადა, რომ ის იზიარებს წაყენებულ ბრალდებას.
მოსამართლის განცხადებით, გიგა შალიკაძის გადაწყვეტილება ხვალ, 2 აგვისტოს, 12:00 საათზე გამოცხადდება.
შეგახსენებთ, რომ გუშინ მეორედ გაიმართა საპროტესტო აქცია ბათუმის პორტში, რუსეთიდან შემოსული საკრუიზო გემის წინააღმდეგ.
საპროტესტო აქციაზე დააკავეს „დროას“ რეგიონული ხელმძღვანელი გენრი დოლიძეც, მისი სასამართლო პროცესიც დღეს არის ჩანიშნული. წინასწარი ინფორმაციით, გენრი დოლიძეს დაკავებისას სცემეს.
აქციაზე დაკავებული ზოგიერთი პირი დღეს ხელწერილით გაათავისუფლეს. სასამართლო პროცესები კი გადაიდო.
_______________
ამ თემაზე:
შესაძლოა იკვეთებოდეს უფლებამოსილების გადამეტება – საია ბათუმში მოქალაქეების დაკავებაზე
