ახალგაზრდა იურისტთა ასოციაციის განცხადებით, დღეს, 31 ივლისს, ბათუმში საპროტესტო აქციაზე მოქალაქეების დაკავების პროცესში შესაძლოა იკვეთებოდეს უფლებამოსილების გადამეტების ფაქტები.
„პოლიციამ 23 პირი ადმინისტრაციული წესით დააკავა, მათ შორის, ერთი უკრაინის მოქალაქე.
დაკავების პროცესში, შესაძლოა, ასევე, იკვეთებოდეს უფლებამოსილების გადამეტების ფაქტები. აღსანიშნავია, რომ თავად ხომალდის მეპატრონესა და დაკავშირებულ კომპანიებთან მიმართებით არსებობს ინფორმაცია მათი სანქცირების შესახებ“ – აცხადებს საია.
საია მოუწოდებს შინაგან საქმეთა სამინისტროს, არ გამოიყენოს მშვიდობიანი დემონსტრანტების მიმართ ძალა და არ დაუშვას უკანონო ადმინისტრაციული დაკავების პრაქტიკა; გაათავისუფლოს აქამდე ადმინისტრაციული წესით დაკავებული პირები; შესაბამისმა დანაყოფებმა დაკავებულების ადვოკატებსა და ოჯახის წევრებს დაუყოვნებლივ მიაწოდონ ინფორმაცია დაკავებულების ადგილმდებარეობისა და მდგომარეობის შესახებ.
საია ასევე მიმართავს სპეციალურ საგამოძიებო სამსახურს, დაიწყოს გამოძიება სამართალდამცავების მხრიდან ძალის შესაძლო გადამეტების ფაქტებზე.
- რა ხდება?
დღეს, 31 ივლისს, ბათუმში მეორედ შემოვიდა რუსეთიდან საკრუიზო გემი „ასტორია გრანდე“, რომელსაც ბათუმში პროტესტით დახვდნენ.
მოქალაქეები მიიჩნევენ, რომ საქართველოში რუსული გემების შემოსვლა ოკუპანტი ქვეყნის რბილ ძალას წარმოადგენს და ისინი არ მიესალმებიან არც რუსულ ტურისტებს და არც რუსულ გემებსა და თვითმფრინავებს.
