დღეს, პირველ აგვისტოს, რუსეთის დედაქალაქში, მოსკოვში, ე.წ. „მასკვა სიტიში“ მდებარე ცათამბჯენს დრონი დაესხა.
ამის შესახებ მოსკოვის მერი, სერგეი სობიანინი წერს ტელეგრამზე.
„საჰაერო თავდაცვის სისტემამ მოსკოვში რამდენიმე უპილოტო საფრენი აპარატი გაფრენის მცდელობისას ჩამოაგდო. ერთი დრონი მიფრინდა სიტიში. დაზიანდა ფასადი 21-ე სართულზე და ჩაიმსხვრა მინა 150 კვადრატულ მეტრზე.
დაშავებულების შესახებ ინფორმაცია არ არის“ – წერს მოსკოვის მერი.
რუსეთის თავდაცვის სამინისტრომ უკვე განაცხადა, რომ ღამით „აღკვეთეს ტერორისტული თავდასხმის მცდელობა“ დრონებით მოსკოვისა და მოსკოვის რეგიონში მდებარე ობიექტებზე. დროებით დაიკეტა ვნუკოვოს აეროპორტი.
ეს უახლოეს დღეებში მოსკოვში დრონის თავდასხმის მეორე შემთხვევაა.
30 ივლისს, გვიან ღამით, მოსკოვის ცენტრში, 50-სართულიან ბიზნესცენტრის მეხუთე-მეექვსე სართულებზე აფეთქება მოხდა. რუსული სამთავრობო მედიის ცნობით, აფეთქება უკრაინული დრონების შეჯახებამ გამოიწვია. შემთხვევას მსხვერპლი არ მოჰყოლია, თუმცა TASS-ის ინფორმაციით, დაშავდა ერთი ადამიანი.
უკრაინულ მხარეს ამ საკითხზე ოფიციალური კომენტარი არ გაუკეთებია, თუმცა უკრაინის პრეზიდენტმა, ვოლოდიმირ ზელენსკიმ, 30 ივლისს განაცხადა, რომ „ომი ბრუნდება რუსეთის ტერიტორიაზე – მის სიმბოლურ ცენტრსა და საბრძოლო ბაზებზე და ეს გარდაუვალი, ბუნებრივი და სრულიად სამართლიანი პროცესია“.
