„არა რუსულ გემს!“, „არა საქართველოს რუსიფიკაციას!“ – ამ სლოგანით იგეგმება ბათუმში საპროტესტო აქცია დღეს, 19:00 საათზე. საპროტესტო აქციის ერთ-ერთი ორგანიზატორი ახალგაზრდული მოძრაობა „დაფიონია“.
საპროტესტო აქცია ბათუმის პორტში გაიმართება, იქ, სადაც ამჟამად რუსეთიდან შემოსული საკრუიზო ლაინერი, „ასტორია გრანდე“ დგას.
საქართველოს მოქალაქეებმა ბათუმში დღეს, 31 ივლისს, მეორედ გააპროტესტეს რუსეთიდან გემის შემოსვლა, რადგან მოქალაქეები მიიჩნევენ, რომ რუსეთი ოკუპანტი, აგრესორი ქვეყანაა და მასზე ეკონომიკური დამოკიდებულების გაძლიერება, კიდევ უფრო მეტ საფრთხეს უქმნის ამ ქვეყანას.
დღეს დილით პოლიციამ 23 ადამიანი დააკავა აქციაზე, ერთ-ერთი დაკავებული უკრაინის მოქალაქეა.
ბათუმის ნავსადგურში აქცია წუხელ, ღამის 12 საათზე დაიწყო, თუმცა ადგილზე მობილიზებული პოლიცია აქციის მონაწილეებს – სამოქალაქო აქტივისტებსა და ოპოზიციური პოლიტიკური პარტიის წევრებს არ აძლევდა ნავსადგურთან შეკრების საშუალებას.
დაანონსებულ აქციამდე რამდენიმე საათით ადრე პოლიციამ გადაკეტა გოგებაშვილისა და რუსთაველის ქუჩები, ნავსადგურთან კი რკინის ჯებირებით შემოღობეს ის ტერიტორია, სადაც საკრუიზო გემი უნდა შემოსულიყო.
ბათუმი. 2023 წლის 31 ივლისი, ბათუმი.
ფოტო: ლელა დუმბაძე/ბათუმელები
საკრუიზო ლაინერი ASTORIA GRANDE ბათუმის ნავსადგურში 27 ივლისს დილითაც შემოვიდა და ბათუმი იმავე დღეს, საღამოს, საპროტესტო აქციის ფონზე დატოვა.
27 ივლისს ბათუმში რუსეთიდან საკრუიზო ლაინერით ჩამოსული ერთ-ერთი მგზავრი ამბობდა, რომ ნამყოფია აფხაზეთში, ანუ შესაძლოა მას დარღვეული ჰქონდეს კანონი ოკუპაციის შესახებ, თუმცა შინაგან საქმეთა სამინისტრომ ამ საკითხზე კომენტარი არ გააკეთა.
„ქართული ოცნების“ თავმჯდომარემ ირაკლი კობახიძემ „ქაჯობად“ შეაფასა მოქალაქეთა საპროტესტო აქცია, რომელიც 27 ივლისს ბათუმში, რუსეთიდან საკრუიზო გემის შემოსვლასთან დაკავშირებით გაიმართა.
საქართველოს პრეზიდენტი სალომე ზურაბიშვილი კი ბათუმის აქციას ტვიტერზე ასე გამოეხმაურა:
