შს სამინისტროს ინფორმაციით, დღეს, 31 ივლისს, ბათუმში 23 ადამიანი დააკავეს რუსეთიდან შემოსული საკრუიზო გემის საწინააღმდეგო აქციაზე.
„ასტორია გრანდე“ უკვე მეორედ შემოვიდა ბათუმის პორტში, გემზე ძირითადად რუსეთის მოქალაქეები იმყოფებიან.
საპროტესტო აქცია გუშინ, საღამოს 12 საათზე იყო დაანონსებული, ამიტომ პოლიციამ გუშინვე გადაკეტა ნავმისადგომის მიმდებარე ტერიტორია და პოლიციის გაძლიერებული კორდონი დაახვედრა მოქალაქეებს.
პოლიციამ აქციის მონაწილეთა დაკავება ღამით დაიწყო. დღეს დილით კი, საკრუიზო გემიდან რუსი ტურისტები ავტობუსებითა და მიკროავტობუსებით, გაძლიერებული დაცვით გამოიყვანეს ქალაქში. აქციის მონაწილეებმა ავტომანქანებს კვერცხები და წყლის ბოთლები დაუშინეს.
პოლიციამ აქციის მონაწილეები დააკავა ტურისტების გამოყვანის დროსაც, როცა ტრანსპორტის გასატარებლად კორიდორი გააკეთეს.
პოლიციამ რუსულ გემთან მიახლოების საშუალება არ მისცა აქციის მონაწილეებს
ფოტო: ლელა დუმბაძე/ბათუმელები
ბათუმის ნავსადგურში რუსეთიდან საკრუიზო გემი „ასტორია გრანდე“ პირველად 27 ივლისს შემოვიდა. მოქალაქეები საპროტესტო აქციებით მაშინაც დახვდნენ და გემმა იმავე ღამით დატოვა ბათუმი პროტესტის ფონზე.
ბათუმში აქცია დღეს, 31 ივლისს, ამ წუთებშიც გრძელდება.
