ლუკაშენკომ „ვაგნერელები“ პუტინთან დააბეზღა – ისინი პოლონეთზე იწევენ

დღეს, 23 ივნისს, ბელარუსის პრეზიდენტი, ალექსანდრე ლუკაშენკო რუსეთის პრეზიდენტ ვლადიმერ პუტინს შეხვდა. ამ შეხვედრაზე ლუკაშენკომ პუტინის მოახსენა, რომ კერძო სამხედრო დაჯგუფება „ვაგნერის“ წევრები, რომლებიც ბელარუსის ტერიტორიაზე იმყოფებიან, „დაძაბულები“ არიან.

ბელარუსის ლიდერი პუტინთან შეხვედრის დროს ირწმუნებოდა, რომ დაქირავებულები თითქოსდა პოლონეთში „ექსკურსიას“ ითხოვენ.

„შეიძლება თქმადაც არ ღირს, მაგრამ „ვაგნერელების“ გამო ჩვენც დაძაბულები ვართ. ისინი ითხოვენ წასვლას დასავლეთში – „მოგვეცით უფლება“. მე ვეუბნები: „რაში გჭირდებათ დასავლეთში წასვლა?“ აბა ასე ჩუმად… ჩვენ ხომ ვაკონტროლებთ, რაც ხდება. ნუ, ექსკურსიაზე წავალთ ვარშავაში და ჟეშოვში“.

აი, ჟეშოვი მათთვის… ისინი ხომ ბახმუტთან იბრძოდნენ და იციან, საიდანაც მოდიოდა სამხედრო ტექნიკა. ეს მათში ზის: ჟეშოვი – ეს უბედურებაა. რა თქმა უნდა, შეთანხმებისამებრ, მე მათ ბელორუსის ცენტრში ვაკავებ. არ ვისურვებდი იქ [პოლონეთში] მათ დისლოცირებას, რადგან ისინი ცუდ ხასიათზე არიან. მათ იციან, რა ხდება მოკავშირე სახელმწიფოს გარშემო,“ – განაცხადა ლუკაშენკომ.

მისივე თქმით, „ვაგნერელებს“ პოლონეთზე „კბილი აქვთ დასობილი“, რადგან ის უკრაინას იარაღით ეხმარება.

მედია ასევე წერს, რომ ლუკაშენკომ პუტინს აჩვენა რუკა, რომელზეც თითქოსდა ასახულია „პოლონეთის ჯარის გადაადგილება მოკავშირე სახელმწიფოს საზღვრებთან – ბრესტსა და გროდნოს შორიახლოს“.

მედიის ინფორმაციით, ალექსანდრე ლუკაშენკოსა და ვლადიმერ პუტინის შეხვედრა სავარაუდოდ ორ დღეს გრძელდებოდა.

___

ივნისის ბოლოს, „ვაგნერი“ და მისი მეთაური ევგენი პრიგოჟინი რუსეთის მმართველ ელიტას აუჯანყდა. ეს ერთდღიანი აჯანყება „მოლაპარაკებით“ დასრულდა – მაშინ ალექსანდრე ლუკაშენკომ დაქირავებულ მებრძოლებს ბელარუსის ტერიტორიაზე დისლოცირების უფლება მისცა.

ბელარუსის თავდაცვის სამინისტროს ცნობით, „ვაგნერის“ წევრები ბელარუსის სამხედროებს „გამოცდილებას გაუზიარებენ“.

ანალიტიკური ცენტრის – „უკრაინული პრიზმის“ დირექტორი, იაროსლავ ჩერნოგორი თვლის, რომ შესაძლებელია დაქირავებულებს გარკვეულ მომენტში სამოქალაქო ტანსაცმელი გადააცვან და დააყენონ მიგრანტების უკან, რომლებიც ევროპაში ბელარუსიდან შეიჭრებიან.