„ეს არ არის შოუ, ყოველი მეტრისთვის სისხლი იღვრება“ – ზალუჟნი უკრაინის კონტრშეტევაზე

უკრაინის შეიარაღებული ძალების მთავარსარდალმა ვალერი ზალუჟნიმ  The Washington Post-თან ინტერვიუში განაცხადა, რომ ჯარისკაცები სისხლს ღვრიან უკრაინის მიწის ყოველი მეტრის დეოკუპაციისთვის, ამიტომ მას აღიზიანებს კომენტარები, რომ უკრაინის კონტრშეტევა მოსალოდნელზე ნელია.

„ეს არ არის შოუ, რომელსაც მთელი მსოფლიო უყურებს და ფსონს დებს. ყოველ დღე ყოველი მეტრი სისხლით არის მოპოვებული“ – თქვა ზალუჟნიმ გამოცემასთან.

მისი თქმით, უკრაინის ჯარები წინ მიიწევენ ყოველ დღე, თუნდაც ეს მხოლოდ 500 მეტრი იყოს.

ზალუჟნიმ ხაზგასმით აღნიშნა, რომ იმისათვის, რომ უკრაინული კონტრშეტევა უფრო სწრაფი იყოს, მას სჭირდება თანამედროვე ტიპის იარაღი და უპირატესობა ჰაერში – F-16-ები.

ინტერვიუში მან თქვა, რომ 24/7-ზე არის კავშირზე აშშ-ის შეიარაღებული ძალების გაერთიანებული შტაბების კომიტეტის მეთაურთან, გენერალ მარკ მილისთან.

„ჩვენ გვაქვს შეთანხმება: 24/7-ზე ჩვენ კავშირზე ვართ. ასე, რომ ხანდახან შემიძლია დავურეკო და ვუთხრა: „თუ კვირაში 100 000 ჭურვი არ მივიღეთ, 1000 ადამიანი მოკვდება“. ჩადექით ჩემს მდგომარეობაში. მაგრამ მილი არ წყვეტს, მივიღებთ ჩვენ საბრძოლო თვითმფრინავებს თუ არა. უბრალოდ სანამ მიიღება გადაწყვეტილება, ყოველ დღე ბევრი ადამიანი კვდება, ძალიან ბევრი. უბრალოდ იმიტომ, რომ გადაწყვეტილება ჯერ არ არის მიღებული“ – თქვა ზალუჟნიმ.