ბახმუტის მიმართულებით უკრაინელმა სამხედროებმა რუსეთის საოკუპაციო ძალებს წაართვეს სტრატეგიული ინიციატივა – ისინი ახორციელებენ შეტევას ფართო ფრონტზე – ამის შესახებ უკრაინის შეიარაღებული ძალების გენერალური შტაბის პრესმდივანმა ანდრეი კოვალევმა „ტელემარეთონის“ ეთერში განაცხადა – წერს უკრაინული მედია.
კოვალევმა განაცხადა, რომ ქალაქ ბახმუტის ფლანგებზე უკრაინის შეიარაღებული ძალები აგრძელებენ ზეწოლას მტერზე, ატოვებინებენ მიტაცებულ ხაზებს და მაგრდებიან ადგილზე.
მისივე თქმით, მძიმე ბრძოლები გრძელდება და რუსეთის საოკუპაციო ძალებს აქვთ პერსონალის, იარაღისა და აღჭურვილობის უზარმაზარ დანაკარგი.
უკრაინის თავდაცვის მინისტრის მოადგილის ანა მალიარის თქმით, კლესჩიევკას მიმართულებით უკრაინელი სამხედროები ჯამურად 1200 მეტრით დაწინაურდნენ, ხოლო კურდიუმივკას მიმართულებით – 1500 მეტრზე.
უკრაინის გენერალური შტაბის 29 ივნისის მოხსენებაში ნათქვამია, რომ ბახმუტის მიმართულებით რუსები უშედეგოდ მიიწევდნენ ორეხოვო-ვასილევკას, ბოგდანოვკასა და ბელაია გორას მიმართულებით.
უკრაინული მედიის ცნობით, გუშინ, 28 ივნისს, უკრაინის შეიარაღებული ძალების მთავარსარდალმა ვალერი ზალუჟნიმ აშშ-ის გაერთიანებული შტაბის უფროსთან, გენერალ მარკთან სატელეფონო საუბრისას განაცხადა, რომ უკრაინის თავდაცვის ძალებმა შეძლეს სტრატეგიული ინიციატივის ხელში ჩაგდება ფრონტზე და წინ მიიწევენ.
