დღეს, 28 ივნისს, კლუბმა „სფერომ“ ფეისბუქზე დაწერა, რომ მომღერალ ნუცა ბუზალაძეს კონცერტი გაუუქმა, რომელიც 30 ივნისს იყო დაგეგმილი.
კლუბის განცხადებით, კონცერტის გაუქმების მიზეზი ნუცას აშშ-ში დაგეგმილი ტურნეა.
„ბოლო დღეებში განვითარებული მოვლენებიდან გამომდინარე, კლუბ „სფეროს“ ადმინისტრაცია საჭიროდ თვლის გაცნობოთ ჩვენი და ნუცა ბუზალაძის ერთობლივი გადაწყვეტილება. ხაზგასმით აღვნიშნავთ, რომ მიღებული გადაწყვეტილება არის ორმხრივი.
30 ივნისს დაგეგმილი კონცერტი ამ ეტაპზე გაუქმებულია.
ნუცა მკაფიოდ აფიქსირებს რუსეთის მიმართ თავის პოზიციას და ხაზგასმით აღნიშნავს, რომ რუსეთი ოკუპანტია! სწორედ ამიტომ რუსეთიდან მიღებულ საკონცერტო შემოთავაზებებზე დიდი ხანია უარს ამბობს.
უახლოეს დღეებში ნუცას დაგეგმილი აქვს ამერიკული ტურნე, რომლის შესახებ დეტალებს მსმენელისთვის სიურპრიზად ტოვებს“, – წერს „სფერო“.
ერთი კვირის წინ ნუცა ბუზალაძე რამდენიმე ქართველ მომღერალთან ერთად მოსკოვში იმყოფებოდა, სადაც კერძო წვეულებაზე კონცერტი გამართეს.
ვიდეოკადრებში ჩანდნენ სოსო პავლიაშვილი, რომელიც პუტინის პოლიტიკის მხარდამჭერია, მეგი გოგიტიძე, რომელიც უკრაინაში მიმდინარე ომის ფონზეც მართავდა რუსეთში კონცერტებს და ღიად პრორუსი, საქართველოში კრემლის იდეოლოგიის გამტარებელი, „კონსერვატიული მოძრაობის“ წევრი, კონსტანტინე მორგოშია.
ნუცა ბუზალაძის ამ გარემოცვაში ყოფნამ და მოსკოვში ვიზიტმა უკრაინაში მიმდინარე ომის ფონზე, გულშემატკივრების უკმაყოფილება გამოიწვია.
___________________
ამ თემაზე:
ვის უმღეროდნენ ნუცა ბუზალაძე, ხვიჩა მაღლაკელიძე და სხვა ქართველი მომღერლები მოსკოვში
