პარლამენტის წევრი ტარიელ ნაკაიძე საქართველოში მცხოვრები რელიგიური უმცირესობებისთვის მნიშვნელოვანი რელიგიური დღესასწაულების უქმე დღედ გამოცხადებას ითხოვს. მათ შორის მუსლიმური დღესასწაულების.
„მე, მაგალითად, როგორც მუსლიმი, იძულებული ვარ, რომ არ დავესწრო სესიას, რადგან მუსლიმები ხვალ, 28 ივნისს, ყურბან-ბაირამის დღესასწაულს აღვნიშნავთ.
მსგავს სიტუაციაში არიან საქართველოში მცხოვრები მუსლიმები, რომლებიც მუშაობენ კერძო თუ საჯარო სამსახურებში და არ ეძლევათ შესაძლებლობა, სრულფასოვნად აღნიშნონ მათთვის მნიშვნელოვანი რელიგიური დღესასწაული.
იგივე ვითარებაა საგანმანათლებლო დაწესებულებებშიც, რადგან ამ დღესასწაულებს ხშირად ემთხვევა გამოცდების თარიღები, სასწავლო პროცესი და ადამიანები ინდივიდუალურად ცდილობენ, რომ ან გააცდინონ სკოლა, უნივერსიტეტი ან ვერ აღნიშნონ სათანადოდ ეს დღე“, – ამბობს ტარიელ ნაკაიძე.
მისი თქმით, წელიწადში სულ 6 დღეზეა საუბარი და აქ მოიაზრება როგორც მუსლიმების, იეზიდების, ასევე ქრისტიანული რელიგიური უმცირესობების მნიშვნელოვანი დღესასწაულებიც.
„ამ მიმართულებით ვმუშაობ და საშემოდგომო სესიაზე შემოვიტან საკანონმდებლო ინიციატივას. იმედი მაქვს, ამ ინიციატივას მხარს დაუჭერს როგორც „ქართული ოცნება“, ასევე ოპოზიცია“, – ამბობს ტარიელ ნაკაიძე.
